hvítabók • fylgibind 2 fyrisiting - Løgmansskrivstovan

12 · Hvítabók – Fylgibind 2
Kriminalforsorgin
Uttanríkistænasta
Kriminalforsorgin í Føroyum er deild av Direktoratet for kriminalforsorgen
í Danmark. Uppgávan er at hava eftirlit við fólki, sum
verða revsað uttan fyri fangahússkipanina. Hesi eru fólk, ið eru
royndarleyslatin, eru dømd at gera samfelagstænastu, eru í rúsdrekkaviðgerð
o.a. Harumframt røkir forsorgin sosialar uppgávur í
varðhaldinum.
Trý fólk starvast á kriminalforsorgini, og Løgmansskrivstovan
mælir til, at virksemið í sambandi við fullveldi í fyrsta umfarið
verður yvirtikið, sum tað er. Hetta fer ikki at krevja stórvegis fyrireiking.
Kostnaðurin av rakstrinum verður um leið ein millión kr. um árið.
Øll uttanríkisviðurskifti eru felagsmál, men í royndum virkar heimastýrið
fyri ein part sjálvstøðugt á økinum. Vit gera fiskiveiðusáttmálar
við onnur lond, og vit eru gjaldandi limir í fimm ymiskum
millumtjóða felagsskapum.
Ein uttanríkisdeild við seks fólkum er í Tinganesi, umframt at eitt
fólk er í Brússel, trý í Keypmannahavn og eitt í Aberdeen. Í miðfyrisitingini
eru harafturat starvsfólk, sum arbeiða við uttanríkisviðurskiftum
á sínum øki.
Í donsku uttanríkistænastuni er eitt starvsfólk, sum burturav hevur
til uppgávu at taka sær av føroyskum viðurskiftum. Ein føroyingur
hevur vanliga sitið í hesum starvi.
Vit standa sostatt ikki heilt á berum á hesum umráði, hóast talan
er um felagsmál.
Hóast hetta, kann fullveldisætlanin seta krøv til bæði lóggávu, fyrisiting
og fígging. Løgmansskrivstovan mælir tí til, at tveir møguleikar
verða umhugsaðir. Annar er, at tað verður ásett í fullveldissáttmálanum,
at danska uttanríkistænastan tekur sær av okkara uttanríkismálum
á teimum økjum, sum vit ikki hava orku til. Hin er, at vit
tryggja okkum danskan stuðul í eini skiftistíð, og nýta hesa tíðina til
at byggja upp eina sjálvstøðuga, føroyska tænastu.
Verður seinna loysnin vald, má arbeiðast fram ímóti at seta á stovn
sendistovur í Keypmannahavn, Oslo, Reykjavík, London, Washington,
New York, (ST), og Brússel, (ES). At stovna sendistovur í fyrrverandi
miðveldinum, grannalondunum, teimum týdningarmestu marknaðunum,
og har teir stóru, altjóða felagsskapirnir hava miðstøð, er vanligt,
tá fullveldi verður stovnsett í smáum londum.
Hetta gerst sjálvsagt ikki frá degi til dags, men Løgmansskrivstovan