hvítabók • fylgibind 2 fyrisiting - Løgmansskrivstovan

Samstarvsavtalur
Almanna- og heilsumálastýrið · 373
Lóg um embætislæknar er sett í gildi í Føroyum við kongligari fyriskipan.
Høvuðsuppgávurnar sambært lógini hevur Landslæknin.
Danska rakstrarjáttanin til Landslæknan varð í 1998 1,1 mio. kr.
Landslæknin er partur av danska Heilsustýrinum og hevur sostatt
tætt samstarv við stovnin. Økið krevur, á sama hátt sum góðkenningarlógirnar
og „lov om Sundhedsvæsenets Centralstyrelse,“ stóra
fakliga vitan um heilsufakligar reglur, ráðgeving av heilsumyndugleikum
og eftirlit. Gjølligari kanningar eru neyðugar, til tess at gera
eitt skikkað tilmæli um tær uppgávur, ið landslæknaembætið hevur.
Kongligu fyriskipanirnar um sjúklingatrygging og „videnskabsetisk
komitésystem“ eru samtyktar í Løgtinginum, men donsku myndugleikarnir
hava ikki enn sett tær í gildi fyri Føroyar.
Sambært hesum fyriskipanum eru føroyingar partur av donsku
skipanunum. Í viðmerkingunum til lógaruppskotini verður sagt, at
tað hevði verið sera dýrt at sett í verk skipanir sum hesar í Føroyum,
og at umsitingin hevði verið sera stór. Harumframt hevði verið trupult
at bygt upp sama serkunnleika sum í Danmark. Mett var tí, at
ráðiligast hevði verið at knýtt seg til donsku skipanina.
Lógirnar omanfyri snúgva seg í høvuðsdráttum um heilsufakligan
serkunnleika og altjóða krøv til heilsuverk. Lógirnar krevja stóra umsiting
og seta stór krøv til starvsfólk um serkunnleika. Spurningurin
er tí, á sama hátt sum við góðkenningarlógunum, um ráðiligt er, at
hesi øki koma undir føroyskt málsræði, ella um samstarvsavtala í staðin
skal verða gjørd við Danmark ella eitt av grannalondum okkara.
Tá ið støða skal verða tikin um hetta, mugu gjølligar kanningar
verða gjørdar av, hvussu stór umsitingin av nevndu økjum skuldi verið
í Føroyum, og hvussu kostnaðarmikið tað hevði verið at tey komu
undir føroyskt málsræði.
Umframt lóggávu hava stovnar undir Almanna- og heilsumálastýrinum
eisini formligar og óformligar avtalur við danska statin. Við
formligar avtalur verður hugsað um skrivligar avtalur, og við óformligar
avtalur verður hugsað um aðrar, munnligar avtalur við Danmark,
har uppgávurnar eru kostnaðarmiklar ella krevjandi fyri stovnin.
Sjúkrahúsverkið hevur formligt samstarv við Ríkissjúkrahúsið, og í
summum førum við onnur donsk sjúkrahús um serviðgerð av sjúklingum.
Hetta rindar sjúkrahúsverkið dønum útreiðslurnar fyri.
Apoteksverk Føroya hevur formligt samstarv við danir ígjøgnum
sáttmálan hjá Amternes Lægemiddelregistreringskontor um forskriftir
fyri ávísan heilivág. Apotekið er eisini bundið av altjóða sáttmálum,
sum Danmark hevur undirskrivað. Føroya landsstýri gjørdi í 1951