hvítabók • fylgibind 2 fyrisiting - Løgmansskrivstovan

224 · Hvítabók – Fylgibind 2
1.12. Niðurstøður
Væntandi stendst eingin fíggjarligur kostnaður av yvirtøku av hesari
lóggávu, men um so er, er fíggjarligi myndugleikin Undirvísingar- og
mentamálastýrið.
Viðvíkjandi teimum donsku rættarreglunum, sum eru í gildi í Føroyum,
verður mett, at møguligt fullveldi ikki fer at hava avleiðingar
av týdningi fyri lóggávu og fyrisiting. Henda meting er grundað á, at
Løgtingið í stóran mun hevur nýtt heimildirnar at seta í gildi føroyskar
lógir innan fyri karmarnar av donsku rammulógunum. Samstundis
hevur føroyska fyrisitingin ognað sær neyðugu fyrisitingarligu
royndirnar í tíðarskeiðnum, sum málsøkið fyrisitingarliga hevur verið
føroyskt. Eitt sindur torførari er at meta um tær fíggjarligu avleiðingarnar.
Fyri fólkaskúlan, frítíðarundirvísingina, handilsskúlar og læraraútbúgvingina
er niðurstøðan hin sama. Tað verður ikki mett, at fullveldi
fer at hava nakra fyrisitingarliga ávirkan. Málsøkini eru fyrisitingarliga
yvirtikin, og hóast rammulógirnar eftir fullveldi fara úr gildi,
eiga løgtingslógir við heimild í hesi lóg framhaldandi at verða í gildi.
Sambært § 9 í heimastýrislógini hava danir fíggjarligu ábyrgdina á
økjunum. Danir hava tó við ríkislóg latið føroyska heimastýrinum
upp í hendi skylduna til at rinda útreiðslurnar á økjunum. Fyri hetta
fær heimastýrið blokkstuðul.
Danska lógin um tænastumenn í fólkaskúlanum sigur, at danir hava
skyldu at endurrinda 80% av eftirlønini hjá tænastumonnunum, sum
er vunnin áðrenn 1988. Henda eftirløn kann verða gjørd upp og
kanska tikin við, sum eitt føroyskt krav til møguligar samráðingar
millum føroysku og donsku myndugleikarnar.
Ríkistilmælið um nýggja fjølmiðlaábyrgdarlóg er samtykt av Løgtinginum,
og fer henda lóg, tá ið hon kemur í gildi í Føroyum, at seta
allar hinar fjølmiðlalógirnar úr gildi.
Mett verður, at nakrar av teimum ríkislógunum, sum eru, ella í
næstum verða settar í gildi fyri Føroyar, eiga at verða verandi í gildi.
Talan er m.a. um fjølmiðlaábyrgdarlógina og upphavsrættindalógina.
Hinvegin eru aðrar lógir, sum settar eru í gildi fyri Føroyar, óneyðugar,
m.a. lógin um Kongliga Leikhúsið.
Fíggjarliga hava teir donsku ríkismyndugleikarnir, sambært § 9 í
heimastýrislógini, framvegis fíggjarligu ábyrgdina av einum stórum
parti av málsøkjunum. Hvørjar fíggjarligar avleiðingar fullveldi fær,
má metast at vera ein spurningur, sum í stóran mun er tengdur at
avtaluni, sum føroysku myndugleikarnir gera við danir.