hvítabók • fylgibind 2 fyrisiting - Løgmansskrivstovan

Inngangur
Inngangur · 7
Landsstýrismaðurin í sjálvstýrismálum álegði í november 1998 teirri
føroysku miðfyrisitingini hesar uppgávur:
1) At lýsa, á hvørjum økjum samstarvað verður við Danmark í dag,
og týdningin av hesum samstarvi fíggjarliga, fyrisitingarliga og
lógarliga.
2) At lýsa, hvørji mál Danmark umsitur í dag, og hvar tey kunnu
verða skipað í einum føroyskum fullveldi.
3) At lýsa krøvini til lóggávu, fyrisiting, fígging og komandi samstarvsavtalur,
tá Føroyar skulu umsita alt sjálvar.
4) At gera uppskot til, á hvørjum økjum tørvur verður á samstarvsavtalum
við Danmark.
5) At gera málsetingar fyri sjálvstøðuga umsiting á málsøkinum og
tíðarætlanir fyri málsetingarnar.
Síðan hava Løgmansskrivstovan og aðalstýrini hvør sær arbeitt við at
lýsa hesi viðurskifti.
Úrslitið av arbeiðinum er savnað í hesum áliti. Álitið er ein skrá
yvir danskar rættarreglur, sum galda í Føroyum, føroyskar rættarreglur,
sum vísa til danskar myndugleikar, og ein skrá yvir tað samstarv,
sum annars er millum føroyskar og danskar myndugleikar og
stovnar.
Víst verður á, hvar og hvussu fullveldisætlanin ávirkar tey ymisku
málsøkini, hvørji øki kunnu koma undir endaligt føroyskt málsræði
beinanvegin, og hvørji øki eru so stór, dýr ella torgreidd, at neyðugt
verður at samstarva við danskar myndugleikar og stovnar í eini skiftistíð.
Har fyrisitingin hevur hildið seg til tað, eru málsetingar gjørdar fyri
sjálvstøðuga umsiting á teimum økjum, har mett verður, at vit kunnu
taka við ábyrgdini.
Álitið er fyrst og fremst ætlað fakfólki, umsiting og politikarum
sum stuðul í sambandi við fullveldisætlanina – bæði tá farast skal
undir samráðingar við stjórnina um eina skiftistíð, og tá kannast skal,
hvussu vit í einum fullveldi best laga okkara fyrisiting til okkara fortreytir
og tørv.
Hetta er tískil ikki eitt uppskot um, hvussu vit skulu skipa ta føroysku
fyrisitingina í fullveldinum, men eitt grundarlag undir tí til-