hvítabók • fylgibind 2 fyrisiting - Løgmansskrivstovan

Almanna- og heilsumálastýrið · 293
forsikringsforeningen ráðføra seg við eitt læknaligt ráðgevaranet, sum
eisini er knýtt at skipanini.
Avgerðin hjá felagnum kann verða kærd til Patientskadeankenævnet.
2. Lóggáva
Sum er, er bert culpaábyrgd í føroyska sjúkrahúsverkinum. Tað merkir,
at sjúklingurin sjálvur skal prógva, at eitt mistak er gjørt, tá ið hann
er vorðin viðgjørdur á føroyskum sjúkrahúsi. Hetta er sera óheppið,
tí ofta er sera torført hjá sjúklinginum at prógva mistakið.
Hetta verður broytt við hesi lóg. Ætlanin við henni er at víðka um
endurgjaldsrættin hjá sjúklinginum og at tryggja, at sjúklingurin fær
endurgjaldið skjótari og lættari enn eftir reglunum, sum nú eru. Í
„Lov om patientforsikring“ er ábyrgdin ikki avmarkað til culpaábyrgd,
tó at talan heldur ikki er um vanliga, objektiva ábyrgd.
Rætturin hjá sjúklinginum til endurgjald er ikki tengdur at, um t.d.
ein lækni hevur átikið sær sjálvsábyrgd av skaðanum. Meginreglan í
lógini er, at endurgjaldsábyrgdin umfatar allar skaðar av kanning, viðgerð
ella tílíkum, sum sjúklingurin sambært eini objektivari meting
kundi verið sloppin undan, antin við at havt ein royndari lækna, ella
við at nýtt aðrar viðgerðarhættir. Harumframt fær sjúklingurin eisini
endurgjald fyri skaðar, sum koma av brekum í teknisku tólunum á
sjúkrahúsinum, og um so er, at sjúklingurin av viðgerðini fær aðra
smittu, sum ikki er rímiligt, at hann skal gjalda útreiðslurnar av sjálvur.
Heimild er fyri at seta lógina í gildi fyri Føroyar við kongligari fyriskipan.
Lógin snýr seg um endurgjald til sjúklingar. Bæði endurgjaldsábyrgd
og heilsuverkið eru felagsmál. Tryggingarvirksemið er sermál,
men lógin snýr seg tó ikki um tryggingarvirksemi. Tann parturin av
lógini, sum hevur við trygging at gera, snýr seg um, at tann endurgjaldsskyldugi
skal gera tryggingaravtalu við eitt tryggingarfelag. Tað
merkir, at lógin regulerar tryggingaravtalur, og hesar eru ikki sermál.
Tí verður lógin sett í gildi fyri Føroyar við kongligari fyriskipan.
Føroyska lógin verður at kalla átøk tí donsku. Frávikini eru, at
teksturin verður broyttur soleiðis, at sjúklingatryggingin fer at galda
fyri sjúklingaskaða, ið er hendur í Føroyum ella í Danmark, at tilvísingarnar
í lógini eru broyttar í samsvari við lóggávuna í Føroyum, og
at gildiskomureglurnar eru øðrvísi.
Lógin varð samtykt á Løgtingi í tingsetuni 1998/99 og er send
donsku ríkismyndugleikunum, tí tað eru teir, sum skulu seta lógina í
gildi fyri Føroyar við at lýsa hana í Kunngerðablaðnum B. Av tí at
hetta ikki er gjørt enn, er lógin heldur ikki komin í gildi.
Klaga frá sjúklingi fær sambært hesi lóg eina sera holla viðgerð í
donsku skipanini, sum byggir á drúgvar royndir við endurgjaldi til