hvítabók • fylgibind 2 fyrisiting - Løgmansskrivstovan

168 · Hvítabók – Fylgibind 2
økinum at gera, vil natúrliga kunna hoyra undir Fiskimálastýrið, sum
hevur sjóvinnu sum ábyrgdarøki.
Avmerking av siglingarøkjum kann verða skipað undir Vinnumálastýrið,
t.e. Landsverkfrøðingin, av tí at hesin stovnur samarbeiðir við
Farvandsdirektoratet um hetta.
Tele Danmark A/S hevur ábyrgdina av neyð- og trygdarskipanini á
radioøkinum. Føroya Tele rekur støðina Tórshavn radio vegna Tele
Danmark. Telestyrelsen hevur ábyrgdina á virkisøkinum hjá Tele
Danmark. Økið hevði natúrliga kunnað verið skipað undir Føroya
tele.
Kemur alt sjóvinnumálsøkið undir føroyskt sjálvræði, kunnu ríkislógir,
við tí gildi, tær nú hava, verða innførdar í føroyska løgtingslóggávu,
eftir at tær eru umsettar til føroyskt. Av tí at sjóvinnuøkið eisini er
altjóða øki, skal umsitingin eisini kunna arbeiða í altjóða viðurskiftum,
har lógir og fyriskipanir um trygd á sjónum verða gjørdar. Hetta
setir sera stór krøv til umsitingina, tí at í flestu førum er talan um
serkunnleika, sum sjóvinnumyndugleikin skal hava sambært altjóða
sáttmálum.
Umsitingin má skipa seg soleiðis, at serkunnleiki má vera á hesum
økjum:
• skipaeftirlit, sum krevur tekniskan vitan um konstruktiv krøv til
skip
• sjóvinnuumsiting, operationella vitan um skiparakstur, herímillum
manning av skipi, førleikakrøv og sosial viðurskifti
• sjóvinnuútbúgvingar, vitan um hvørji altjóða krøv verða sett til
sjóvinnuútbúgvingar o.a.
Umframt at fíggja umsitingina, liggur tað eisini á limalondum í altjóða
felagsskapum, t.d. IMO, at gjalda fyri limaskap.
Av tí at altjóða arbeiðið krevur serkunnleika á nógvum økjum, er
skilagott, at myndugleikarnir í ymsu londunum kunnu vera felags um
hetta. Dømi um tað er í norðurlendska samstarvinum, har høvuðsmálini
í t.d. IMO verða viðgjørd. Velja Føroyar tó ikki at hava serkunnleika
á øllum økjum, er neyðugt at gera samstarvssáttmálar við
grannalond okkara, sum kunnu stuðla okkara arbeiði har.
Í sambandi við fullveldi eiga Føroyar beinanvegin at taka ábyrgdina
av øllum økinum og at gera nýggjar samstarvsavtalur við danir um
serkøna hjálp í eini skiftistíð.