hvítabók • fylgibind 2 fyrisiting - Løgmansskrivstovan

82 · Hvítabók – Fylgibind 2
Samstarv við aðrar stovnar
Ríkisumboðið samstarvar í prinsippinum við allar almennar myndugleikar
í ríkinum, teirra millum øll donsk umboð í útlondum. Eisini
samstarvar ríkisumboðið við eina røð av almennum og privatum fyritøkum.
Starvsfólk og bygnaður
Á ríkisumboðnum starvast 13 fólk til samans. Av teimum eru fýra
útbúgvin á lærdum háskúla.
Stovnurin er býttur í fýra høvuðsøki, eitt fyri fígging, almenn mál og
innanhýsis umsiting, eitt fyri løgmál, almenn mál o.tíl, eitt, sum tekur
sær av bókførslu, umseting, tekstviðgerð og avgreiðslu, og so er eisini
eitt tænastufólk. Aftur at nevndu uppgávum kemur skipið Thorshavn.
Kostnaður
Ríkisumboðnum eru játtaðar 6.2 mió. kr. til rakstur. Ríkisumboðið
hevur eina árliga inntøku, sum stavar frá sølu av útgávuvirksemi og
íbúðargjaldi frá starvsfólkum, sum búgva í embætisbústaðnum.
Niðurstøða
Fullveldið ber við sær, at sivilrættarligu málini koma øll undir føroyskt
málsræði. Henda broyting setir eingi beinleiðis krøv til lóggávuna.
Vanliga kunnu avgerðir hjá ríkisumboðnum kærast til Civilretsdirektoratet.
At málið kemur undir føroyskt málsræði, krevur, at støða
verður tikin til, hvønn ið avgerðir skulu kunna kærast til. Fyrisitingarliga
ber hetta við sær, at tørvur verður á fimm ársverkum.
Um hugt verður at uppgávunum, sum koma undir bólkin: aðrar høvuðsuppgávur,
sæst, at flest allar av hesum falla burtur við fullveldinum.
Ríkisumboðið gevur út „Lovregister for Færøerne“ saman við Løgmansskrivstovuni.
Nevnt skal vera í hesum sambandi, at Løgmansskrivstovan
arbeiðir við at seta í verk lógdátagrunn, har grundtilfarið
er Lógbókin fyri Føroyar, og á henda hátt verður alt lógartilfar atkomiligt
gjøgnum internótina.
Samanumtikið verður mett, at sivilrættarligu málini kunnu verða
flutt undir føroyskt málsræði uttan stórvegis fyrireikingar, og málini
kunnu verða umsitin á løgdeildini á Løgmansskrivstovuni. Mett verður,
at kostnaðurin fyri at umsita sivilrættarligu lóggávuna fer at liggja
um 1,5 mió. kr. árliga.