hvítabók • fylgibind 2 fyrisiting - Løgmansskrivstovan

Almanna- og heilsumálastýrið · 295
Av tí at málsøkið ikki er yvirtikið, er heimild fyri at seta lógina í
gildi fyri Føroyar við kongligari fyriskipan.
Sambært viðmerkingunum til lógaruppskotið er tað ein fyrimunur
við skipanini, at føroyska vísindasiðseminevndin verður knýtt at „Den
Centrale Videnskabsetiske Komité,“ sum er høvuðsmyndugleiki hjá
donsku økisnevndunum. Soleiðis kunnu føroyingar fáa neyðuga vegleiðing
frá høvuðsnevndini, samstundis sum skipanin ikki verður so
dýr hjá føroyingum at umsita.
Teksturin í uppskotinum er tillagaður føroysk viðurskifti, soleiðis
at ásett verður, hvussu nevndin skal verða uppbygd, og hvussu sambandið
ímillum føroysku nevndina og donsku høvuðsnevndina skal
vera. Eisini verður lógin broytt soleiðis, at hon í staðin fyri at áseta,
hvørjar uppgávur donsku nevndirnar hava, ásetir, hvørjar uppgávur
føroyska nevndin skal hava.
Lógin varð samtykt á Løgtingi í tingsetuni 1998/99 og er send
donsku ríkismyndugleikunum, tí tað eru teir, sum skulu seta lógina í
gildi fyri Føroyar við at lýsa hana í Kunngerðablaðnum B. Av tí at
hetta ikki er gjørt enn, er lógin tískil ikki komin í gildi.
3. Fíggjarlig ábyrgd
Mett verður, at fíggjarligi kostnaðurin av uppskotinum verður uml.
50.000 kr. um árið. Væntandi fara teir sjey nevndarlimirnir at hava
um tíggju fundir árliga. Landsstýrismaðurin rindar limunum fundarpening
og ferðaútreiðslur eftir vanligum reglum, sum galda fyri tænastumenn.
Í kongligu fyriskipanini er eisini møguleiki fyri, at landsstýrismaðurin
ásetir reglur um, at limirnir, umframt hetta, fáa dagog
tímapening eftir vanligum reglum, sum galda fyri tænastumenn,
umframt endurgjald fyri mista arbeiðsinntøku, og at formaðurin,
næstformaðurin og skrivarin kunnu fáa viðbót ella løn fyri sítt arbeiði.
Harumframt kunnu standast útreiðslur av, at teir tveir føroysku limirnir
í donsku høvuðsnevndini skulu fáa ferðaútreiðslur til Danmarkar
goldnar í sambandi við fundir, sum høvuðsnevndin hevur.