hvítabók • fylgibind 2 fyrisiting - Løgmansskrivstovan

Kapittul 4
Almanna- og heilsumálastýrið · 313
Rammulógin fyri almannaøkið, við útfyllandi
lóggávu
Rammulógin á sosiala økinum:
L.315 af 17. maj 1995.
Í 1995 var „L.nr. 315 fra 17.05.1995 om sociale ydelser på Færøerne“
sett í gildi sambært avtalu millum danskar og føroyskar myndugleikar.
Talan er um rammulóg, sum áleggur og gevur føroyskum myndugleikum
heimild at yvirtaka og áseta reglur um uppgávur, veitingar og
fyrisiting í almannaverkinum á hesum økjum:
• forsorgarhjálp
• pensiónsskipan
• serlig tilboð til fólk við sálarligum ella likamligum breki
• serlig tilboð til fólk við varandi sjúku- ella ellisbreki
• tilboð til fólk við serligum sosialum trupulleikum
• reglur um dagtilboð og hjálp til børn og ung
• barnagjald til einsamallar uppihaldarar
• heimahjálp
• revalideringshjálp
• dagpening við óarbeiðsføri av sjúku, barnsburð ella føðing
Orðið „rammulóg“ merkir, at føroyska heimastýrið innan fyri ávísar
rammur hevur fingið heimild til at áseta føroyskar reglur. Heimildin
til at áseta reglur sambært hesi lóg verður tulkað í eini rúmari merking
enn t.d. heimildin í rammulógini á heilsuøkinum, (sí kap. 5). Á
almannaøkinum verður eisini lóggivið á økjum, sum ikki beinleiðis
eru nevnd í rammulógini, og hetta ber t.d. ikki til sambært rammulógini
á heilsuøkinum.
Rammulógin ásetir, at donsku almannalógirnar, ið eru í gildi í Føroyum,
verða verandi í gildi, til tær verða avloystar av føroyskum løgtingslógum.
Sambært avtalu við danir skulu hesar vera lidnar í
seinasta lagi 1999, og sostatt verður almannaøkið bæði fyrisitingarliga
(frá 1975) og lógarliga føroyskt.