hvítabók • fylgibind 2 fyrisiting - Løgmansskrivstovan

144 · Hvítabók – Fylgibind 2
Ongar fyrisitingarligar ella fíggjarligar uppgávur eru knýttar at hesi
lóg.
Loðsur, sjóreglur o.a.
– L.nr. 157 af 22.12.1876 om Opfiskning af Ankere, Ankertouge og
andet Skibsredskab m.m.
Lóggáva: Lógin ásetir rættindi og skyldur hjá tí, sum finnur eitt akker
á botni, antin tað er leyst akker, ella akker, sum er bundið í boyu.
Somu reglur galda fyri aðra skipsútgerð, sum verður funnin á havbotninum.
Lógin er frá 1876 og er nú heilt ótíðarhóskandi og óneyðug.
Ongar fyrisitingarligar ella fíggjarligar uppgávur eru knýttar at hesi
lóg.
– L.nr. 68 af 29.03.1893 om Afståelse af Grund til Fyranlæg m.m.
Lóggáva: Lógin er um ognartøku av jørð til vitar og tað, sum til hoyrir,
t.e. onnur hús við vitan, veg og jørð til vitapassarafólkini. Flotamálaráðharranum
verður heimilað at áseta í hvørjum einstøkum føri,
hvat er neyðugt at ognartaka. Mett verður ikki, at henda lóg er neyðug
longur.
Í lógini er ásett, at ognartøka kemur undir vanligar reglur um ognartøku,
tá ið tað almennað skal byggja á privatari grund.
Tær fyrisitingarligu og fíggjarligu uppgávurnar eru helst álagdar
donskum myndugleikum.
– L.nr. 49 af 24.03.1899: Strandingslov for Færøerne, som ændret
ved lov nr. 127 af 15.04.1930.
– A.nr. 114 af 09.05.1912 om Politiets Pligter i Strandingstilfælde
paa Færøerne.
Sambært heimastýrislógini hoyra skipastrandingar undir lista A, og
teir myndugleikar, sum nevndir eru í lógini, landfúti, sýslumenn og
løgregla, hoyra undir lista B.
Fyrisiting: Sambært lógini verða skyldur álagdar fleiri myndugleikum,
tá ið skip er strandað ella er um at stranda. Hesir myndugleikar eru
løgreglan, sýslumenn, landfútin og amtmaðurin. Sama er við vraki og
stykkjagóðsi, sum rekur á land, og sum hevur eitt ávíst mett virði.