hvítabók • fylgibind 2 fyrisiting - Løgmansskrivstovan

Varðhaldið
Samandráttur og niðurstøður · 11
Við fullveldinum koma útlendskar umboðsstovur og sendistovur,
og almennu vitjanirnar fara helst eisini at økjast. Hetta fer at hava
við sær serligar trygdaruppgávur, sum kunnu nerva dagliga raksturin.
Mett verður kortini ikki, at hetta fer at krevja fleiri starvsfólk ella at
tyngja nakað stórvegis um raksturin.
Kostnaður
Løgmansskrivstovan metir, at eitt føroyskt fullveldi er ført fyri at
átaka sær ábyrgdina av lóggávu og fyrisiting á hesum øki.
Men fíggjarliga er talan um eitt rættiliga tungt øki. 152 fólk starvast
hjá løgregluni í Føroyum, og rakstrarútreiðslurnar eru uml. 45 mió.
kr. árliga. Men aftur at hesum fær løgreglan, sum nevnt, nógvar
tænastur úr Danmark uttan at gjalda afturfyri. Løgmansskrivstovan
metir, at virðið á hesum tænastum er í meðal 8,4 mió. kr. til leiðslu
og sertænastur, 5 mió. kr. til serligan greiningarkostnað og 1,5-2 mió.
kr. afturat til starvsfólk til millumtjóða samstarv.
Sum er rindar løgreglan í Føroyum heldur ikki fyri útbúgving av
føroyskum løgreglufólki. Løgmansskrivstovan metir, at virðið liggur
um 2,6 mió. kr. árliga.
Um verandi løgregluskipan verður yvirtikin, sum hon er, og heimastýrið
skal rinda fult fyri allar tær tænastur, sum danir nú gjalda,
verður rakstrarkostnaðurin sostatt um leið 63 mió. kr.
Tað er tí av stórum týdningi, at í avtaluni um skiftistíðina verður
staðfest, at føroyska fullveldið ikki skal átaka sær alla ta fíggjarligu og
fyrisitingarligu ábyrgdina frá degi til dags, og at nakað av samstarvinum
millum løgregluna í Føroyum og Danmark kann halda fram í
skiftistíðini.
Løgmansskrivstovan mælir eisini til, at gjøllari útgreiningar verða
gjørdar av løgregluni fyri at kanna, um til ber at skipa eina føroyska
løgreglu um, so hon verður meira virkisfør og betur lagað til tann
føroyska tørvin. Harafturat skal verða kannað, um hon í samstarvi við
aðrar føroyskar myndugleikar eisini kann greiða aðrar uppgávur, enn
hon ger nú, soleiðis at nýggj servitan kann verða uppbygd í landinum,
og ágóðin av hesum kann ganga báðar vegir.
Í varðhaldinum starvast í dag 12 fólk, og tað kostar statinum góðar 4
mió. kr. árliga.
Men føroyingar við longri dómum enn eitt ár – teir eru millum ein
og fimm í senn – sita í fangahúsi í Danmark. Skulu langtíðarfangar
sita í Føroyum, mugu íløgur verða gjørdar, so hesum fangum verða
tryggjaðar hóskandi umstøður.