hvítabók • fylgibind 2 fyrisiting - Løgmansskrivstovan

80 · Hvítabók – Fylgibind 2
landssmálum. Tí starvast undir myndugleika Landsstýrisins í veruleikanum
fleiri enn tólv fólk við føroyskum uttanlandsmálum.
Spurningurin er so, um hetta er nóg mikið til at taka ímóti fyrsta
fullveldisdegi. Til tess at svara hesum er neyðugt at hyggja at, hvat ið
eigur at vera framt á fyrsta fullveldisdegi. Hesi stig mugu tá vera tikin:
Í fullveldissáttmálanum við Danmark mugu vera ásetingar um fyrisitingarligt
samstarv á uttanríkispolitiska økinum millum avvarðandi
myndugleikar í Føroyum og Danmark í eini skiftistíð upp á um leið 10
ár, alt eftir, hvussu skjótt føroyska uttanríkistænastan verður útbygd.
Føroya landsstýri má hava tikið stig til føroyskan limaskap í Sameindu
tjóðum, og á tann hátt hava tryggjað sær viðurkenning av fullveldi
Føroya frá limalondunum.
Við hesum tiltøkum og verandi manning Føroya í uttanríkismálum
ber til at taka ímóti fyrsta fullveldisdegi, men greitt er, at tá má alt
fyri eitt farast til verka at byggja upp eina føroyska uttanríkistænastu,
bæði innan- og uttanlands, um ikki Føroya landsstýri ætlar at fyrisitingarliga
samstarvið við danska uttanríkismálaráðið, ásett í fullveldissáttmálanum,
skal gerast varandi.
Av tí at ein føroysk uttanríkistænasta fer at krevja 36 fólk aftur at
teim 12, sum nú eru, er greitt, at fólk mugu útbúgvast, setast í starv
og eftirútbúgvast. Tað verður helst trupult at seta fleiri enn trý ella
fýra fólk hvørt árið. Av tí at vit kunnu rokna við einum ávísum fráfalli,
kunnu eini 10-15 ár fara at ganga, áðrenn føroyska uttanríkistænastan
verður fullmannað. Føroya landsstýri eigur tí at fáa í lag
semjur við fleiri lond um at læra upp starvsfólk í føroysku uttanríkistænastuni
til tess at menna førleika teirra sum sendifólk.
Ymsar hugsanir kunnu vera um, hvar Føroyar eiga at hava sendistovur
og umboðsstovur. Eftir uppskotinum í hesi frágreiðing
verða fimm sendistovur og tvær umboðsstovur. Tá ið Føroyar eru
vorðnar fullveldi, fer tað at hava mestan skund at fáa stovnsett
sendistovuna í Keypmannahavn og umboðsstovuna í New York.
Frá fyrsta fullveldisdegi eigur ikki at ganga meira enn eitt ár, til
tey fyrstu útsendu fólkini fara til hesar báðar býir. Síðan eigur Føroya
landsstýri so líðandi eftir tørvi at fara undir at stovna umboðsstovur
og sendistovur.
Niðurstøðan um eina framtíðar føroyska uttanríkistænastu verður
tískil henda. Føroya landsstýri kann antin gera av at varðveita verandi
føroysku uttanríkistænastu og samsvarandi fullveldissáttmálanum
tryggja, at danska uttanríkistænastan tekur sær av føroyskum
uttanríkismálum á teimum økjum, har føroysk fyrisitingarorka ikki
røkkur, ella at fullmenna eina føroyska uttanríkistænastu sambært
hesi frágreiðing og samsvarandi fullveldissáttmálanum tryggja, at
danska uttanríkistænastan, alt eftir, hvussu nógv tann føroyska er