hvítabók • fylgibind 2 fyrisiting - Løgmansskrivstovan

Løgmansskrivstovan · 79
kann fáa týdning fyri føroyskar útflutningsfyritøkur. Mangt bendir á,
at í løtuni hava føroyskar útflutningsfyritøkur trupult við at koma
framat á fjarmarknaðum, serstakliga tí at tær ikki hava fíggjarorku til
at stovna egnar skrivstovur á fremmandum marknaðum til marknaðarføring.
Sostatt kundu føroyskar sendistovur og umboðsstovur,
umframt at røkja stjórnarsamskifti Føroya við onnur lond, eisini arbeitt
fyri handilsligum áhugamálum hjá føroyskum útflutningsfyritøkum.
Búskaparlig árin av útlendskum sendistovum í Føroyum
Verða Føroyar fullveldi, fara onnur lond væntandi at fáa sær sendistovur
í Havn. Í løtuni er ilt at siga, hvussu nógvar tær kunnu fara at
verða, tí at eingin ivi er um, at fleiri av londunum fara at mæla til, at
sendiharrum teirra í grannalondum Føroya verður veitt sendiheimild
til eisini at starvast í Føroyum.
Tó er líkt til, at umframt Norðurlond fara stórveldini at hava sendistovur
í Havn. Havandi í huga, hvussu lítil føroyski búskapurin er,
kann virksemið hjá hesum sendistovum fáa týdning fyri inntøkusíðuna
á fíggjarløgtingslógini og fyri føroyska búskapin yvirhøvur. Við
øðrum orðum kann virksemið hjá útlendskum sendistovum fyri ein
part javna út samfelagsbúskaparligu útreiðslurnar av eini føroyskari
uttanríkistænastu.
Samandráttur
Við støði í tí uppskoti, sum lýst er omanfyri um eina føroyska uttanríkistænastu,
verður í fyrstu syftu einans tørvur á framhaldandi samstarvi
um ræðismál. Tørvurin fer tó at minka so hvørt, sum føroyska
uttanríkistænastan fær í lag eina skipan við føroyskum ræðismonnum
kring heimin. Nevnast skal, at slíkar skipanir vanliga ikki bera við sær
útreiðslur. Tó kunnu í einstøkum førum verða útreiðslur av ítøkiligum
málum.
Til tess at stovna eina føroyska uttanríkistænastu krevjast væl umhugsaðar
ætlanir, peningur og fólk og eftirútbúgving av fólki. Ikki
verður tó byrjað heilt á berum sum í Íslandi í ávikavist 1918 og 1944.
Føroya landsstýri hevur longu eina uttanlandsdeild á Løgmansskrivstovuni
við seks fólkum og einum fólki í Brússel. Aftur at hesum sjey
á uttanlandsdeildini eru knýtt trý fólk at viðskiftastovuni í Keypmannahavn,
og eitt er í Aberdeen. Harafturat er eitt starvsfólk, sum í
løtuni starvast við uttanlandsmálum Føroya á eini skrivstovu í danska
uttanríkismálaráðnum, men sum verður lønt av Løgmansskrivstovuni,
og sum vísir til hennara. Sostatt hevur føroyska uttanlandstænastan
tólv fólk í starvi til samans. Her eru ikki tald við tey starvsfólk hjá
aðalstýrunum, ið undir verandi heimastýrisskipan arbeiða við uttan-