hvítabók • fylgibind 2 fyrisiting - Løgmansskrivstovan

208 · Hvítabók – Fylgibind 2
Kapittul 5
Mál, sum Danmark umsitur, og sum natúrliga
kunnu verða skipað undir tey ávísu málsøkini
og møguligar samstarvsavtalur
Kortlegging, t.e. at gera kort av Føroyum, er uppgáva hjá Kort- og
Matrikelstyrelsen. Henda uppgáva kann verða løgd undir Vinnumálastýrið
og Matrikkulstovuna.
Løggildi, (akkreditering), verður veitt við heimild í danskari vinnuframalóg,
sum eyðsýnt ikki kann vera í gildi, um ríkisrættarstøðan
verður broytt. Í Íslandi er ein løggildisstova, (akkrediteringsstovnur),
sum t.d. løggildar kemiskar kanningarstovur. Í Føroyum kundi tílíkur
stovnur verðið skipaður undir ein av stovnum Vinnumálastýrisins.
Samstarvsavtala kundi verðið gjørd við annað land um løggildisskipan.
Einkarætt og mynsturlóggávu umsita danska patentdirektoratið o.o. Í
Føroyum kundi Skráseting Føroya umsitið økið, men neyðugt verður
helst at gera samstarvsavtalu við onnur lond um t.d. patentrættin, tí
neyvan er grundarlag undir einum patentstovni í Føroyum.
Havumhvørvisvernd hava danskir myndugleikar umsitið. Nú økið er
vorðið føroyskt, er neyðugt, at landsstýrismaðurin í umhvørvismálum
býtur uppgávurnar millum ymsu aðalstýrini.
Radiosamskifti, herundir serstakliga altjóða samstarv og frekvensfyrisiting,
verður heilt lagt saman við Fjarskiftiseftirlitinum, ið er stovnur
undir Vinnumálastýrinum. Tørvur er á einum starvsfólki við góðum
førleika.
Ilt er at siga, hvør skal umsita tilbúgvingarøkið av røttum, um málsøkið,
sum er partvíst føroyskt og partvíst danskt, skal verða føroyskt
burturav. Tilbúgving er sundurbýtt millum land og kommunur, umframt
at hon fevnir um fleiri aðalstýri. Tilbúgvingarøkið fevnir m.a.
um sjúkrahúsverkið (Almanna- og heilsumálastýrið), løgregluna,