hvítabók • fylgibind 2 fyrisiting - Løgmansskrivstovan

100 · Hvítabók – Fylgibind 2
• sergjørd útgerð, (bilar og onnur samskiftistól, ritbúnaður, búnar,
trygdar-og verndarútgerð, o.tíl.)
• útbúgving, (grundútbúgving, framhaldsútbúgving, eftirútbúgving
og viðlíkahaldsútbúgvingarskeið)
• kriminaltekniskar kanningar
Her kunnu vit við vissu siga, at av tí at fólkatalið her er so lítið, liðið
er fáment, og seruppgávurnar av hvørjum slagi so fáar, verður løgreglan
bíligari í rakstri, og nevndu tænastur verða betri og støðugari,
um vit gera samstarvsavtalur við eitt ella fleiri onnur lond, ið hvussu
so er fyri partar av uppgávunum.
Ræður um skráseting, er helst rímiligt at siga, at av tí sambandið
millum fólk í Føroyum og í Danmark er so tætt, hevði tað verið fyrimunur
fyri báðar partar, um ein skipan, sum er átøk teirri verandi,
kundi hildið áfram, tó at hetta ikki er alneyðugt. At økið verður føroyskt
hevur við sær fyri Føroyar, at antin má skrásetingarlóggávan
verða broytt, ella ein serlig lógarheimild verða gjørd. Fyri Danmark
verður fortreytin væntandi, at føroyski parturin av skipanini lýkur ESkrøv
fyri skrásetingarreglur í sambandi við triðjalandssamstarv um
persónsskráir.
Dómsvaldið
Roknað kann verða við, at neyðugt verður at gera samstarvsavtalur í
eini skiftistíð. Nógv og ymisk krøv verða sett til dómsvaldið, bæði á
fakøkinum og á skipanarøkinum.
Sum nevnt í lýsingini av dómsvaldinum, fer ein serlig undirnevnd
undir grundlógarnevndini at arbeiða burturav við hesum evni, og tí
verður økið ikki lýst neyvari í hesi syftu.