hvítabók • fylgibind 2 fyrisiting - Løgmansskrivstovan

Almanna- og heilsumálastýrið · 317
Somuleiðis eiga barnaverndarnevndir at gera bý- og bygdarráð varug
við barnaansingartrupulleikar, t.d. um ansingin ikki er góð, ella um børn
koma í trupulleikar av, at tørvur er á ansingarplássum í býi ella bygd.
Barnaverndin skal eisini hava eftirlit við øllum børnum undir 14
ár, sum eru í pleygu ímóti gjaldi, øllum børnum undir 7 ár, sum eru
fødd uttan fyri hjúnalag, og teimum børnum, sum fáa barnagjald frá
tí almenna eftir lógini um „Børnebidrag til enlige forsørgere.”
Barnaverndin kann harafturat gera av at hava eftirlit við børnum,
sum eru í pleygu, ið ikki verður goldið fyri, og við ættleiddum børnum
undir 14 ár. Barnaverndini nýtist ikki at hava eftirlit við børnum,
sum eru fødd uttan fyri hjúnalag, um tey liva í góðum korum, børnum,
sum fáa barnagjald, og børnum, ið eru í pleygu, har tey liva í
góðum korum.
Uppgávan hjá Almannastovuni sambært lógini er at ráðgeva og
leiðbeina barnaverndum og at greiða ivamál ímillum barnaverndir.
Almannastovan kann vegna eina barnavernd gera av, at barn ikki skal
flyta frá pleygufamilju, men skal halda áfram at búgva hjá henni. Almannastovan
kann harumframt seta fyribyrgjandi fyriskipanir í verk
og er kærumyndugleiki hjá barnaverndunum.
Uppgávan hjá landsstýrismanninum í almannamálum sambært
barnaforsorgarlógini er at áseta reglur fyri arbeiðið hjá barnaverndunum,
um hvussu tær skal føra sítt eftirlit, eins og hann er kærumyndugleiki
hjá Almannastovuni.
Landsstýrismaðurin í almannamálum skal eisini sambært lógini
góðkenna dag- og samdøgursstovnar fyri børn og ung, tá ið tílíkir
verða skipaðir.
2. Lóggáva
Barnaforsorgarlógin er fólkatingslóg, sum er sett í gildi fyri alt ríkið.
Danska lógin á økinum er nú avtikin, og í staðin er barnaforsorgarøkið
regulerað í donsku forsorgarskipanini, men av tí at avtøkan av
donsku lógini ikki er lýst í Føroyum, er lógin enn í gildi her.
Lógin er partur av rammulógini, og verður tí arbeitt við at gera
føroyska barnaforsorgarlóg.
Við heimild í lógini eru hesar broytingar gjørdar, og hesar kunngerðir
og lógir settar í gildi:
– L. nr. 393 af 20.05. 1992 og L. nr. 393 af 22.06.1993)
– K. nr. 43 frá 24.03.1993 um afturgjaldsskyldu viðvíkjandi útreiðslum
til egnan bústað.
– K. nr. 50 frá 25.03.1993 um barnaforsorg.
– K. nr. 62 frá 01.04.1993 um dagstovnar, dagrøkt og samdøgursstovnar
fyri børn og ung.