hvítabók • fylgibind 2 fyrisiting - Løgmansskrivstovan

Løgmansskrivstovan · 45
sum regulerar viðurskiftini millum borgararnar í samfelagnum. Tað,
sum eyðkennir økið, er, at fáar lógarbroytingar verða gjørdar, (sí
kapittul 2). Hetta merkir, at málini krevja ikki stóra fyrisiting, uttan
tað, at donsku rættarreglarnar verða týddar til føroyskt. Mett verður,
at týðingararbeiðið kann verða gjørt eftir stuttari tíð.
Í føroysku rættarreglunum, sum vísa til danskar myndugleikar,
verður neyðugt at strika ávísar tilvísingar. Lítið og einki arbeiði er av
hesum.
At ríkislóggáva, ið er viðgjørd undir kap. 2.1, fer undir føroyskt málsræði,
kemur hinvegin at seta løgdeildini nýggj krøv, tí neyðugt verður tá
at fylgja við gongdini á økinum, bæði uttan- og innanlands, fyri at vera
búgvin at gera neyðugar lógarbroytingar á økinum.
Skulu Føroyar umsita uttanlandsmál burturav, krevur hetta harumframt,
at løgdeildin verður styrkt, serliga tá ið ræður um altjóða rætt.
Tað er torført at ímynda sær, at løgfrøðiligu uppgávurnar á hesum
øki kunnu verða greiddar í einum umhvørvi við færri enn fýra ársverkum.
Uttanríkistænasta
Á uttanlandsøkinum eru tveir møguleikar. Annar møguleikin er at
varðveita verandi føroysku uttanríkistænastuna og í fullveldissáttmálanum
tryggja, at danska uttanríkistænastan tekur sær av føroyskum
uttanríkismálum, har ið føroysk fyrisitingarorka ikki røkkur.
Um henda avgerðin verður tikin, verða eingi stórvegis krøv til føroysku
fyrisitingina.
Hin møguleikin er, at Føroya landsstýri ger av at fullmenna eina
føroyska uttanríkistænastu sambært frágreiðingini í hesum áliti. Um
henda avgerðin verður tikin, kann talan verða um at seta 36 fólk aftur
at teim núverandi 12. Tað er greitt, at starvsfólkini skulu útbúgvast,
setast í starv og eftirútbúgvast. Mett verður, at helst verður trupult
at seta fleiri enn trý ella fýra fólk um árið. Av tí at roknast skal við
ávísum fráfalli, verður mett, at eini 10-15 ár fara at ganga, áðrenn
føroyska uttanríkistænastan verður fullmannað.
Verður avgerð tikin um at byggja upp eina føroyska uttanríkistænastu,
setir hetta krøv til fyrisitingina, sum skal vera til reiðar at skipa
starvsfólkaviðurskiftini til tann tørvin, sum verður. Hugsað verður serliga
um útbúgvingarviðurskiftini.
Harumframt verður eisini talan um praktisk viðurskifti sum t.d. at
geva sendistovum og umboðsstovum neyðugar arbeiðsumstøður.
Sivilrættarmál
Um sivilrættarmál, (kap. 3.2), er at siga, at henda uppgáva er nógv
minni enn uppgávan at røkja uttanríkistænastuna. Mett verður í