hvítabók • fylgibind 2 fyrisiting - Løgmansskrivstovan

Almanna- og heilsumálastýrið · 297
leyst av Heilsumálaráðnum og hevur tær heilsufakligu uppgávurnar
á heilsuøkinum um hendi. Rakstrarjáttanin fyri fíggjarárið 1999 er
127,0 mió. kr.
Um góðkenningarlógir kann sum heild verða sagt, at tær allar lúka
altjóða krøv fyri heilsuútbúgvingar. Viðmerkt verður eisini í hesum
sambandi, at ein harmonisering er gjørd í ES, sum tryggjar, at heilsuútbúgvingar
skulu lúka somu krøv, bæði í londum í ES og í EBS. Góðkenningarlógirnar
eru ikki tiknar við í rammulógina um heilsuverkið,
(sí kap. 5), tí mett varð ikki, at føroyska heimastýrið hevði serkunnleika
og orku á økinum til at áseta reglur. Mett varð heldur ikki, at
heimastýrið hevði orku til at halda skipanina við líka við at seta neyðugu
lógirnar á økinum í gildi og dagføra tær og hava fakligt eftirlit
við heilsustarvsfólkinum.
Í dag hevur føroyska umsitingin stórar trupulleikar við at dagføra
góðkenningarlógirnar, so at hesar hava sama orðaljóð sum tær donsku.
Tað krevur størri umsiting at gera hetta arbeiði til fulnar.
Tá ið góðkenningarlóg verður sett í gildi ella dagførd, verða næstan
ongar broytingar gjørdar frá tí donsku lógini. Hetta, tí at lógirnar bert
snúgva seg um altjóða standardir fyri heilsuligum útbúgvingum, og
tískil ikki um serføroyskar umstøður. Hóast hetta hava slíkar lógir
nógva umsiting við sær í Føroyum.
At geva eina mynd av hesi umsiting, skal greitt verða frá mannagongdini,
tá ið slík lógaruppskot koma fyri.
Lógin verður fyrst send til hoyringar hjá øllum viðkomandi stovnum.
Almanna- og heilsumálastýrið og stovnarnir skulu seta seg gjølla
inn í lógartekstin fyri at vita, um eitthvørt skuldi verið broytt afturímóti
tí donsku lógini. Tá ið hoyringarsvar eru afturkomin, skal Almanna-
og heilsumálastýrið samanskrivað svarini, gera gjølligar viðmerkingar
til lógaruppskotið og síðani senda uppskotið til eftirkanningar
á lógardeildini á Løgmansskrivstovuni. Lógardeildin skal somuleiðis
seta seg gjølla inn í uppskotið, gera viðmerkingar og senda hetta
aftur til stýrið. Stýrið og lógardeildin diskutera síðani, um broytingar
skulu verða gjørdar í uppskotinum. Síðani verður uppskotið sent á
landsstýrisfund og viðgjørt av øllum samgonguflokkunum sum vanligt
lógaruppskot. Á Løgtingi skal uppskotið hava tríggjar viðgerðir umframt
nevndarviðgerð sum vanligt lógaruppskot. Eftir at uppskotið er
samtykt, verður tað sent aftur til Almanna- og heilsumálastýrið, sum
sendir samtykta uppskotið ígjøgnum ríkisumboðið niður til donsku
stjórnina. Danski ráðharrin á økinum skal saman við drotningini
undirskrivað kongligu fyriskipanina, og ríkisumboðið lýsir síðan
fyriskipanina í Kunngerðablaðnum B. Skulu broytingar seinni verða
gjørdar í lógini, skal nevnda mannagongd ganga um aftur, og heldur
ikki í hesum umfari verða broytingar gjørdar frá danska tekstinum.