hvítabók • fylgibind 2 fyrisiting - Løgmansskrivstovan

3. Fiskimálastýrið
Fiskivinnumál
Sjóvinnumál
Samandráttur og niðurstøður · 19
Á teimum lógarøkjum, sum Fiskimálastýrið fyrisitur, er nógv tann
størsti parturin av ábyrgdini undir heimastýrinum, bæði hvat viðvíkir
fígging, lóggávu og fyrisiting.
Nøkur øki eru kortini, har lóggávan antin er donsk burturav, har
føroysk og donsk lóggáva eru samantvinnaðar, og har fíggingin eisini
er donsk ella partvíst donsk. Tílík viðurskifti finna vit bæði á fiskivinnuøkinum,
sjóvinnuøkinum og skrásetingarøkinum.
Her verður tískil nakað av lóggávuarbeiði at gera, eins og tørvur
verður á, at vit tryggja okkum samstarv við danskar myndugleikar á
nøkrum økjum eina tíð fram.
Á fiskivinnuøkinum eru lóggávan um „Danmarks Riges Fiskeriterritorium“
og kunngerðin um „Fiskeriterritoriet ved Færøerne“ formelt
týdningarmikil donsk øki, har ábyrgdin skal verða flutt til eitt føroyskt
fullveldi.
Hetta er kortini ikki nøkur stór uppgáva – tað er nóg mikið, at
galdandi lógir á økinum verða lýstar sum føroyskar lógir.
Uppgávuna at útinna eftirlit og bjarging á sjónum røkja Fiskiveiðueftirlitið
og Færøernes Kommando í felag. Við fullveldinum verður
hetta føroyskt starv burturav. Fiskiveiðueftirlitið skal tá bæði standa
fyri eftirliti og bjarging, og røkja uppgávuna at verja sjómarkið. – T.e.
at hevda fullveldið.
Her verður tørvur á íløgum í eitt minni bjargingarskip og eina tyrlu
aftur at teirri verandi, soleiðis at ein tyrla altíð er tøk til fiskiveiðueftirlit,
bjarging og sjúkraflutning. Tyrlan kann eisini verða brúkt til
ferða- og farmaflutning til og frá útoyggjum og útplássum.
Eykakostnaðurin av hesum verður um leið 10 mió. kr. árliga, men
sum skilst, er talan um fleiri stýri, ið koma at gera íløgurnar og bera
rakstrarkostnaðin.
Lóggávan um sjóvinnumál er lutvíst donsk og lutvíst yvirtikin sum
føroyskt sermál.
Lóggávan í sambandi við skipaeftirlit (t.e. lógin um skipatryggleika)
og avmerking av siglingarleiðum verður fyrisitin av donskum myndugleikum
meðan lóggávan í sambandi við manningarviðurskifti og
sjóvinnuútbúgvingar verður fyrisitin av føroyskum myndugleikum. Tá