hvítabók • fylgibind 2 fyrisiting - Løgmansskrivstovan

Løgmansskrivstovan · 77
Starvsfólk: Ein sendiharri
Fýra sendifulltrúar, (ein teirra
varasendiharri)
Tveir skrivarar
Rakstrarútreiðslur: 7. mió. kr.
Árligur kostnaður av føroyskum limaskapi í millumríkjafelagsskapum
Tað kann verða ymiskt, hvussu neyðugt tað er fyri Føroyar at vera
limir í teim ymsu felagsskapunum, sum áður eru nevndir. Føroyar eru
longu limir í onkrum teirra, antin sum sjálvstøðugur limur,
(NAMMCO), ella við óbeinleiðis limaskapi sum danskur ríkispartur,
(IWC).
Summir felagsskapir eru nevndir, tí tað er eyðsæð, at spurningurin
um limaskap í hesum heilt vist fer at stinga seg upp í eini fullveldistilgongd,
hóast tað enn ikki er greitt, um politiska valdið í Føroyum
vil hava slíkan limaskap.
Samanløgdu, árligu útreiðslurnar av limagjaldi í øllum hesum 37
felagsskapum eru mettar til um leið 13 milliónir krónur, (við 25%
óvissu hvønn vegin). Metingarnar byggja á verandi limagjøld hjá Føroyum
í fimm felagsskapum, umframt gjøld hjá Íslandi, San Marino
og Danmark. Tó er ikki vist, at Føroyar fara at søkja um limaskap í
øllum hesum felagsskapum. Millum teir dýrastu felagsskapirnar eru
Sameindu tjóðir, Norðurlandaráðið og Norðuratlantski sáttmálafelagsskapurin.
Av áðurnevndu 37 millumríkjafelagsskapum eru Føroyar longu
gjaldandi limir í fimm teirra: ICES, NAFO, NAMMCO, NEAFC og
NASCO. Vit gjalda hesum til samans 762.834 krónur í 1999. Varliga
mett eiga Føroyar við fullveldi í øllum førum at gerast limir í einum
8-15 millumríkjafelagsskapum afturat. Tað fer at merkja, at fullveldi
væntandi fer at hava við sær eina eykaútreiðslu til limagjøld í millumríkjafelagsskapum
upp á í minsta lagi 3-6 milliónir krónur. Vilja Føroyar
gerast limir í upp aftur fleiri felagsskapum, økjast útreiðslurnar
til limagjøld samsvarandi. Tó fer limaskapur í einum millumríkjafelagsskapi
ofta at hava vinnulig áhugamál, og tá verður limagjald í slíkum
felagsskapi at rokna sum ein fyritreyt fyri at tryggja landinum
inntøkur á viðkomandi økjum.
Árligur rakstrarkostnaður av eini útbygdari uttanríkisdeild
Sum áður sagt verður tann frymilin nýttur sum ein av fyritreytunum
fyri at skipa eina føroyska uttanríkistænastu er, at ein triðingur av
starvsfólkinum starvast í Føroyum og tveir triðingar út í heimi. Av tí
at føroyskar sendistovur og umboðsstovur, eftir lýsingini omanfyri,