hvítabók • fylgibind 2 fyrisiting - Løgmansskrivstovan

300 · Hvítabók – Fylgibind 2
Sundhedsstyrelsen heimild til at geva læknanum góðkenningina
aftur.
Fara ringar farsóttir ella tílíkt at ganga í Føroyum, og fólkið hevur
størri tørv á læknahjálp, kann Sundhedsstyrelsen, við heimild frá
heilsumálaráðharranum, geva øðrum læknum tíðaravmarkað loyvi til
at arbeiða í Føroyum.
Avgerðir hjá Sundhedsstyrelsen um at geva og taka góðkenning frá
lækna, kunnu verða kærdar til heilsumálaráðharran.
Sundhedsstyrelsen hevur heimild til at føra neyvt eftirlit við ordinatiónunum
av euforiserandi evnum hjá einum lækna. Sundhedsstyrelsen
ger sjálvt av, nær neyvt eftirlit er neyðugt. Um lækni ordinerar
euforiserandi evni óráðiliga, kann Sundhedsstyrelsen taka frá
honum rættin at ordinera hesi evni í 1-5 ár, ella til annað verður avgjørt.
Sundhedsstyrelsen kann geva læknum og apotekarum boð um
fólk, sum tað heldur misnýta euforiserandi evni.
Sundhedsstyrelsen hevur vanliga eftirlitið við læknunum og ansar
eftir, at teir røkja sítt læknastarv sambært lógini. Sundhedsstyrelsen
kann krevja upplýsingar frá læknunum, soleiðis at eftirlitið kann
verða gjørt til lítar.
Sundhedsstyrelsen almannakunnger, at góðkenningar og loyvi eru
givin ella afturtikin, og gevur apotekarum og embætislæknum í landinum
boð um mistan rætt til at ordinera euforiserandi evni.
Landslæknin er tann forlongdi armurin hjá Sundhedsstyrelsen í
Føroyum, (sí omanfyri, kap. 2). Uppgávan hjá landslæknanum sambært
hesi lóg er at átaka sær skyldur hjá lækna, sum hevur mist rættin
til at ordinera euforiserandi evni.
Uppgávan hjá fútanum er, at um lækni gerst sekur í grovari ella
endurtakandi misrøkt í starvi sínum, skal fútin átala hetta, og verður
læknin tá revsaður við bót ella hefti.
2. Lóggáva
Lógin ásetir í høvuðsdráttum, hvat krevst av góðkendum læknum og
virksemi teirra í Føroyum.
Lógin er sett í gildi fyri Føroyar við kongligari fyriskipan í 1935.
Danski staturin hevur ábyrgdina av at tilevna lógina og laga hana til
føroyskar umstøður og kunngerðir. Í royndum verður hetta arbeiði tó
gjørt í føroysku umsitingini. Lógin er ikki dagførd í Føroyum síðani
1992, av tí at føroyska umsitingin hevur ikki havt neyðuga arbeiðsorku
til tess. Sjálvt um lógin varð dagførd í 1992, eru fleiri broytingar
eldri enn tað, sum ikki eru komnar við í fyriskipanina, sum er í gildi
fyri Føroyar. Kongligu fyriskipanirnar skulu verða samtyktar á Løgtingi
og lýstar í føroyska kunngerðablaðnum fyri at hava gildi fyri
Føroyar.