hvítabók • fylgibind 2 fyrisiting - Løgmansskrivstovan

268 · Hvítabók – Fylgibind 2
Mál, sum ikki eru yvirtikin sum sermál sambært heimastýrislógini,
eru felagsmál. Hvat heilsuøkinum viðvíkir, kunnu hesi mál gerast sermál,
við at heimastýrið ella danska stjórnin formliga seta fram ynski
um, at so skal verða.
Felagsmálini verða sum høvuðsregla umsitin av ríkismyndugleikunum
og sostatt eisini regulerað við danskari lóggávu, sum er sett í
gildi fyri Føroyar. Hetta er tó ikki galdandi fyri § 9-yvirtøkur, men er
galdandi fyri góðkenningarlógir, (autorisatiónslógir), og felagsmál annars
á heilsuøkinum.
Henda frágreiðing, sum lýsir almanna- og heilsuøkið, er ætlað sum
uppslagsverk, so at til ber at sláa upp eina ávísa lóg og finna allar
neyðugar upplýsingar um hana. Fyri at hetta skuldi ganga í lag, hevur
verið neyðugt við nógvum endurtøkum í frágreiðingini.
Kapitlarnir í frágreiðingini eru skipaðir eftir, hvat slag av lógum,
talan er um. Við hesi uppseting skuldi borið til at lýst, hvat ið krevst
viðvíkjandi teimum ymsu lóggávunum í sambandi við fullveldi.
Í lýsingini eru allar galdandi lóggávur fyri almanna- og heilsuøkið í
Føroyum. Verður talan um fullveldi í Føroyum, hevði verið áhugavert
at kannað lóggávu í øðrum londum, sum t.d. Íslandi ella øðrum smátjóðum,
fyri at sammeta økini ella síggja, um almanna- og heilsulóggávan
kanska skuldi verið heilt øðrvísi uppbygd, enn hon er nú.
Høvi var ikki til hetta í hesi frágreiðing, men hon er eitt fyrsta stig
til størri útgreiningararbeiði av, hvør lóggáva skal galda á almanna- og
heilsuøkinum, um talan verður um fullveldi.