hvítabók • fylgibind 2 fyrisiting - Løgmansskrivstovan

32 · Hvítabók – Fylgibind 2
irnar, sum eru í gildi í Føroyum á hesum økjum, verða verandi í gildi
inntil tær verða avloystar av løgtingslógum.
Í seinastu avtaluni við stjórnina varð ásett, at allar løgtingslógirnar
á økinum skulu vera lidnar í seinasta lagi í 1999.
Á almannaøkinum manglar heimastýrið framvegis at tilevna flestu
løgtingslógirnar sambært rammulógini. Løgtingslóg um almannapensiónir
o.a. varð samtykt av løgtinginum í tingsetuni 1998/99.
Viðvíkjandi hinum løgtingslógunum sum gerast skulu sambært
rammulógini – forsorgarlógini, barnaforsorgarlógini og dagpengingalógini
– verður miðað ímóti at leggja løgtingslógaruppskot fyri løgtingið
í tingsetuni 1999-2000.
Tá ið hesar lógir eru samtyktar, er alt almannaøkið yvirtikið viðvíkjandi
umsiting og lóggávu. Arbeiðið viðvíkjandi almannalóggávuni
verður kortini ikki liðugt, tí sambært flestu lógum skulu kunngerðir
og vegleiðingar gerast á teimum ymisku økjunum. Harumframt verða
broytingar alla tíðina gjørdar í skipanunum til tess at finna tær bestu
loysnirnar til føroysk viðurskifti. Meira sannlíkt er tí, at økið verður
liðugt skipað og lagað til føroysk viðurskifti um nøkur ár.
Á heilsuøkinum manglar heimastýrið bert at uppfylla rammulógina
viðvíkjandi kommunulæknaskipan, skúlalæknaskipan og sjúkratrygging.
Løgtingslóg um kommunulæknar varð samtykt av løgtinginum í
tingsetuni 1998-1999. Landsstýrismaðurin miðjar ímóti at leggja løgtingslógaruppskot
um sjúkratrygging og skúlalæknaskipan fyri løgtingið
í tingsetuni 1999-2000.
Tá ið hesar lógir eru samtyktar, er heilsuøkið yvirtikið á teimum
økjum sum snúgva seg um veitingar til borgaran, men ikki viðvíkjandi
heilsufakligum reglum. Á tí økinum eru danskar reglur framvegis
galdandi.
Á heilsuøkinum hevur Sundhedsstyrelsen kortini framvegis týdningarmiklar
fakligar uppgávur at røkja í Føroyum. Tær eru at hava
eftirlit við sjúkrahúsverkinum og heilsustarvsfólkunum í Føroyum, og
at áseta ávísar fakligar reglur á økinum.
Almanna- og heilsumálastýrið mælir til, at alt hetta økið verður
kannað nærri um broytingar skulu gerast.
Sum heild hava danskir myndugleikar ein stóran leiklut í skipanini
í dag, og um stórvegis broytingar skulu gerast innan økið, er neyðugt
at kanna tað neyvari. Politisk støða má takast til hvar tað skal umsitast
í framtíðini eins og til støðið á økinum.