hvítabók • fylgibind 2 fyrisiting - Løgmansskrivstovan

28 · Hvítabók – Fylgibind 2
Kirkjan
liga og fíggjarliga, og tað er týdningarmikið, at hetta samstarv og hesi
rættindi verða varðveitt í eini skiftistíð.
Kirkjan er einasta øki, sum staturin bæði fíggjar og umsitur í dag, og
sum natúrligt er at skipa undir Undirvísingar- og mentamálastýrið.
Lóggávuarbeiðið verður kortini neyvan tað nógva í hesum sambandi,
tí lógarkarmurin um eina føroyska kirkju verður longu fyrireikaður.
Hóast ríkislógartilmæli um nýggjar kirkjulógir vórðu samtykt
í Løgtinginum í 1998, so hevur landsstýrismaðurin í kirkjumálum
eisini sett arbeiðsbólk at fyrireika yvirtøkuna av kirkjuni og at
gera uppskot til føroyska kirkjulóggávu.
Tískil er sannlíkt, at tær nýggju kirkjulógirnar verða avloystar av
eini føroyskari kirkjulóggávu undir øllum umstøðum – sama um fullveldisætlanin
verður sett í verk ella ikki.
Verandi fólkakirkja kostar sambært tølunum frá ríkisumboðsmanninum
uml. 12,6 mió. kr., men torført er at meta um, hvat kirkjan fer at
kosta, tá hon verður føroysk. Kostnaðurin veldst um, hvussu lóggávan
verður orðað, og hvussu fyrisitingin, sum danska kirkjumálaráðið nú
stendur fyri, verður skipað, tá hon verður sett á stovn í Føroyum.
Skúlar, sum virka eftir donskum rammulógum
Fólkaskúlin, frítíðarundirvísingin, handilsskúlarnir, teknisku skúlarnir,
Maskinmeistaraskúlin og Læraraskúlin eru yvirtikin sambært § 9 í
heimastýrislógini. T.e., at heimastýrið hevur fingið ta fyrisitingarligu
ábyrgdina og heimild at seta í verk løgtingslógir á økinum við heimild
í donskum rammulógum.
Síðan yvirtøkurnar hevur Føroya løgting vanliga nýtt heimildirnar
at seta í gildi løgtingslógir innan fyri karmarnar á donsku rammulógunum.
Tískil hevur føroyska fyrisitingin fingið tær neyðugu royndirnar
á økinum. Hvat lóggávu og fyrisiting viðvíkir, metir Undirvísingar-
og mentamálastýrið tí ikki, at trupult verður at laga hetta økið
til fullveldisætlanirnar.
Rammulógirnar fara sjálvsagt úr gildi við fullveldinum, men tær
løgtingslógir, sum hava heimild í rammulógunum, kunnu framvegis
vera í gildi. Tørvur verður ikki á øðrum enn at lýsa lógirnar av nýggjum
sum føroyskar lógir.