hvítabók • fylgibind 2 fyrisiting - Løgmansskrivstovan

248 · Hvítabók – Fylgibind 2
Kapittul 6
Á hesum økjum eiga samstarvsavtalur at
verða gjørdar
6.1. Rættindini hjá føroyingum til danskan lestrarstuðul
Flestu føroyingar, sum í dag leita sær uttanlands í lestrarørindum,
velja at fara til Danmarkar. Hesi fara tá úr tí føroysku lestrarstuðulsskipanini
og inn í donsku skipanina, eisini um lisið verður uttan
fyri Danmark. Hóast eingi heilt neyv hagtøl eru um føroyingar, sum
lesa uttanlands, hevur Stuðulsstovnurin við støði í teimum, sum fáa
ferðaískoyti, mett, at uml. 1500 føroyingar lesa uttanlands.
Sum støðan er í dag, hava føroyingar sama rætt, sum aðrir danskir
ríkisborgarar, til lestrarstuðul frá Statens Uddannelsesstøtte. Hvørjar
avleiðingar hesi rættindi fáa, um Føroyar verða skipaðar sum fullveldi,
er torført at meta um, men hugsast kunnu fleiri møguleikar,
• at rættindi føroyinga til danskan lestrarstuðul fella burtur dag frá
degi
• at rættindi føroyinga til danskan lestrarstuðul fella burtur yvir
eitt ásett áramál, ella
• at føroyingar, sum eru føddir, áðrenn skipan av fullveldi, og sum
tí eru danskir ríkisborgarar, varðveita rættin til danskan lestrarstuðul,
men at teir føroyingar, sum verða føddir eftir skipan av
fullveldi, ikki koma at hava henda rættin
Við støði í talinum omanfyri ber til leysliga at meta um lestrarstuðulsútreiðslurnar,
sum Statens Uddannelsesstøtte hevur av lesandi
føroyingum. Um roknað verður við eini stuðulsupphædd, sum er kr.
3.500 um mánaðin, (hetta er á leið tað, sum fæst frá SU) verður árliga
upphæddin til uml. 63 mió. kr.
Eingin ivi er um, at stórar fíggjarligar avbjóðingar eru á hesum øki
og at ein samstarvsavtala eigur at verða gjørd við danir um hetta
málsøki.