hvítabók • fylgibind 2 fyrisiting - Løgmansskrivstovan

Samandráttur og niðurstøður · 25
Væntandi fer eitt tílíkt samstarv at kosta 120.000 kr. árliga. Í løtuni
rinda vit 70.000 kr.
Vinnuframi. Danska lógin um vinnuframa varð sett í gildi fyri Føroyar
í 1995. Umframt akkreditering, sum nevnt frammanfyri, so virkar
TK-stovan sambært hesi lóg. TK-stovan veitir vinnulívinum ókeypis
ráðgeving. Tann danska lógin fer úr gildi við fullveldinum, so um
hetta virksemi skal halda áfram, krevst nýggj føroysk lóggáva á økinum.
TK-stovan kostar uml. 1,8 mió. kr. at reka. Sum er rindar staturin
2/3 og landsstýrið 1/3 av kostnaðinum.
Verja av havumhvørvinum. Hetta er danskt málsøki, men ríkislógartilmæli
er samtykt, sum flytir allar hesar uppgávur innan fyri føroyska
fiskimarkið til heimastýrið. Tí verður henda fyrisitingin undir
øllum umstøðum føroysk, og neyðugt verður við meirjáttan til
Heilsufrøðiligu starvsstovuna og Vaktar- og bjargingartænastuna,
sama um fullveldisætlanin verður framd ella ei. Tað ber ikki til at siga,
hvussu nógv hetta fer at kosta.
Vinnumálastýrið mælir til, at landsstýrismaðurin í umhvørvismálum
býtir uppgávurnar av verjuni millum tey avvarandi stýrini.
Tilbúgving. Arbeitt verður í løtuni við at gera føroyska tilbúgvingarætlan
við lógum, sum taka støði í føroyskum fortreytum. Tí verður
danska sivilforsvarslógin, sum nú er í gildi, helst avtikin undir øllum
umstøðum. Í sambandi við broytingina verður neyðugt, at fólk verða
skúlað í øðrum londum, og at avtala verður gjørd við eitt grannaland
um hjálp, um ein heilt stór vanlukka skuldi hent.
Tilbúgvingarøkið er so mikið umfatandi, at stórur partur av tí fevnir
um økir, ið Vinnumálastýrið ikki umsitur – m.a. sjúkrahúsverkið,
løgregluna, Vaktar- og bjargingartænastuna og ymsar privatar felagsskapir.
Avvarandi aðalstýri hava sjálvi ábyrgdina av, at stovnar undir
stýrunum eru fyrireikaðir, um ein tilbúgvingarstøða skuldi tikið seg
upp. Tó eigur eitt einstakt aðalstýri – t.d. Vinnumálastýrið – at hava
ábyrgdina av, at teir ymsu partarnir í eini framtíðar tilbúgvingarskipan
verða samskipaðir. Vinnumálastýrið heldur eisini, at Brunaumsjón
landsins skal hava eftirlit við, at lógirnar um bruna- og bjargingarmál
á landi verða hildnar. Hetta fer møguliga at krevja, at stovnurin
verður útbygdur.
Annars metir Vinnumálastýrið ikki, at tað fer at kosta nakað meira,
at økið verður føroyskt, uttan so at tað verður raðfest hægri í framtíðini.
Umsiting av einkarætti og mynsturlóggávuni. Í Danmark verður