hvítabók • fylgibind 2 fyrisiting - Løgmansskrivstovan

86 · Hvítabók – Fylgibind 2
Neyðsendardeildin
Varaløgregluovastin er dagligur leiðari á deildini og samstundis varamaður
fyri løgregluovastan.
Deildin hevur sum hin einasta í landinum varðhald alt samdøgrið,
og hevur eisini alarmsentralin.
Deildin ger varðferðir, loysir neyðsendaruppgávur og fremur málsviðgerð
í egnum øki. Tá ið tænastan loyvir tí, verða varðferðir eisini
gjørdar í hinum økjunum.
Rannsóknardeildin
Løgreglukommiserurin er dagligur leiðari.
Deildin fremur, sambært arbeiðsbýtinum millum rannóknardeildina
og neyðsendardeildina, rannsóknir í kriminalmálum í økinum hjá
høvuðsstøðini. Herumframt hevur deildin umsjón við rannsóknum og
málsviðgerð í kriminalmálum á hinum løgreglustøðunum, og kann í
serligum førum átaka sær leiðsluna og rannsóknina í slíkum málum.
Fyrisitingardeildin
Ein varaløgreglukommiserur er dagligur leiðari á deildini, sum virkar
fyri alt landið.
Hinar støðirnar
Á hinum støðunum kring landið, í Klaksvík, Runavík, Vestmanna,
Miðvági, á Sandi og á Tvøroyri, eru sýslumennirnir støðleiðarar.
Sýslumaðurin hevur tilvísing til løgregluovastan í øllum málum;
men vísir tó í øðrum enn løgregluuppgávum fakliga til viðkomandi
myndugleika.
Løgregluovastin skal hava boð um álvarsamar løgregluuppgávur –
um so skal vera, umvegis vakthavandi á høvuðsstøðini. Hesar uppgávur
eru t.d., tá ið leitað verður eftir fólki, fólk verða funnin deyð,
ferðslumál, har onkur er deyður ella illa skaddur, aðrar deyðsvanlukkur,
mál um álvarsaman kriminalitet og annars mál, sum serligt eftirlit
skal verða havt við.
Tørvar eini støð hjálp, skal hon biðja løgregluovastan um hana –
um so skal vera, umvegis vakthavandi á høvuðsstøðini.
Av støðnum verða gjørdar varðferðir, neyðsendaruppgávur verða
loystar og málsviðgerð verður framd í egnum øki. Harumframt kannar
støðin í Miðvági ferðafólk og pass á flogvøllinum.
Lítla fólkaundirlagið – og samsvarandi lítla manningin í smærru
økjunum, serliga í Vestmanna og á Tvøroyri, bera við sær ógvuliga
skiftandi arbeiðsbyrðu, soleiðis at ikki ber til at leggja fastar vaktir
langa tíð frammanundan, og av hesum verður eftirregulerað við eyka
frídøgum, alt eftir, hvussu arbeiðsbyrðan hevur verið.