hvítabók • fylgibind 2 fyrisiting - Løgmansskrivstovan

Almanna- og heilsumálastýrið · 369
landinum, og sum kunnu skapa ein stabilari arbeiðsmarknað, men
sum samstundis hava við sær meirkostnað fyri land og kommunur.
Góðkenningarlógirnar
Ein góðkenningarlóg er lóg, sum ásetur krøvini til góðkenningarnar
hjá heilsustarvsfólki. Lógirnar áseta reglur um, hvørji krøv verða sett
til heilsuútbúgvingina, hvør hevur rætt til at fáa góðkenning sum
heilsustarvsfólk, og hvørji krøv verða sett teimum aftan á, at tey hava
fingið hesa góðkenning. Sundhedsstyrelsen hevur fakliga eftirlitið við
øllum góðkendum heilsustarvsfólki.
Góðkenningarlógirnar byggja allar á altjóða krøv til heilsuútbúgvingar.
Krøvini til heilsuútbúgvingar eru tey somu í øllum londum í
ES og EBS.
Góðkenningarlógir eru felagsmál, og verða tí settar í gildi í Føroyum
við kongligari fyriskipan.
Góðkenningarlógirnar vórðu ikki tiknar við í rammulógina um
heilsuverkið, av tí at mett varð ikki, at føroyska heimastýrið hevði tað
neyðuga fakliga innlitið á økinum til at áseta føroyskar reglur, og
heldur ikki megnaði at halda skipanina við líka við at seta neyðugar
lógir í gildi, at dagføra tær og hava fakligt eftirlit við heilsustarvsfólki.
Høvuðsfyrisitingina sambært lógunum hava heilsumálaráðharrin og
Sundhedsstyrelsen. Ein lítil frágreiðing um hesar myndugleikar kundi
verið viðkomandi í hesum sambandi:
Heilsumálaráðið er ovasti fyrisitingarligi og politiski myndugleiki á
heilsuøkinum í Danmark. Áðrenn Heilsumálaráðið varð stovnað,
hevði Innanríkisráðið allar uppgávur tess. Har, sum í donskum heilsulógum
stendur Innanríkisráðið, er tað sostatt sum oftast Heilsumálaráðið,
sum umsitir uppgávurnar nú.
Í Heilsumálaráðnum arbeiða uml. 160 starvsfólk. Heilsumálaráðið
er skipað í tríggjar deildir við til samans 8 fakøkjum. Rakstrarjáttanin
fyri fíggjarárið 1999 er 103,1 mió.kr.
Sundhedsstyrelsen er stýrið undir Heilsumálaráðnum, sum er
samansett av sakkønum á heilsuøkinum. Sundhedsstyrelsen virkar
leyst av Heilsumálaráðnum og hevur tær heilsufakligu uppgávurnar
á heilsuøkinum um hendi. Rakstrarjáttanin fyri fíggjarárið 1999 er
127,0 mió.kr.
Sum er, hevur føroyska umsitingin stórar trupulleikar við at dagføra
góðkenningarlógirnar. Tað krevur størri umsiting, um hetta arbeiði
skal verða gjørt til fulnar.
Tá ið góðkenningarlógirnar verða settar í gildi ella dagførdar, verða