hvítabók • fylgibind 2 fyrisiting - Løgmansskrivstovan

1.5 Samandráttur
4 – Hvítabók – Fylgibind 2
Løgmansskrivstovan · 49
málanevnd sambært setningi, sum Føroya løgmaður og danski uttanríkismálaráðharrin
hava givið í felag. Eisini er formliga ásettur árligur
fundur millum Føroya løgmann og danska uttanríkismálaráðharran.
Óformligt er samskifti um t.d. almenna kunning frá ávikavist
danska uttanríkismálaráðnum og ríkisumboðsmanninum í Føroyum
um uttanríkisviðurskifti, ið kunnu hava týdning fyri Føroyar. Eisini er
samskifti um fyrispurningar úr Føroyum um ávís uttanríkisviðurskifti
og sínámillum kunning um málsviðgerð av áleikandi føroyskum
uttanlandsmálum.
Í løgmálum samstarva føroyskir og danskir myndugleikar beinleiðis
um ríkislóggávu, sum skal setast í gildi í Føroyum. Hetta er í sambandi
við, at heimastýrið ummælir ríkislógartilmæli. Harumframt er
Løgmansskrivstovan við í arbeiðinum í nevndini, sum løgmálaráðharrin
hevur sett til at gera uppskot til føroyska rættargangslóg.
Væntast kann, at Løgmansskrivstovan fer at hava ein virknari lut í
arbeiðinum hjá ríkismyndugleikunum í sambandi við Schengansamstarvið
og nýggju útlendingalógina, sum ætlanin er at seta í gildi fyri
Føroyar.
Hvat skráseting viðvíkir, hevur Skrásetingareftirlitið óformligt samstarv
við Registertilsynet í Danmark. Samarbeiðið hevur serliga snúð
seg um viðgerð av skráum hjá ríkismyndugleikunum og skráseting í
sambandi við nakrar privatar verkætlanir, har upplýsingar eru savnaðar
í Føroyum, og edv-viðgerðin er farin fram í Danmark. Skrásetingareftirlitið
hevur eisini vent sær til Registertilsynet, tá ið ivi hevur
verið um, hvussu okkurt mál skuldi viðgerast.
Millumlandasáttmálar
Um lóggávu, í sambandi við at uttanríkismál koma undir føroyskt
málsræði, er at siga, at allir millumlandasáttmálar av sær sjálvum fara
úr gildi fyri Føroyar í somu løtu, tær verða skipaðar sum fullveldi.
Undantiknir eru tó fullveldissáttmálin og marknasáttmálar.
Sambært galdandi millumtjóða rætti kunnu føroyskir myndugleikar
í hvørjum einstøkum føri gera av, hvør av galdandi sáttmálum skal
verða settur í gildi aftur fyri Føroyar. Her er tó at hava í huga, at lóg,
ið er sett í gildi fyri Føroyar, í sambandi við at millumlandasáttmáli
er settur at galda her, verður ikki ávirkað.
Í alt kann talan verða um at seta um leið 172 starvsfólk, um roknað
verður við teim fólkunum, sum eru beinleiðis fíggjað úr Danmark.
Harumframt verður roknað við 36 fólkum til eina fult útbygda
uttanlandstænastu, har mett verður, at trý ella fýra verða sett um árið.