hvítabók • fylgibind 2 fyrisiting - Løgmansskrivstovan

180 · Hvítabók – Fylgibind 2
Lóggáva: Talan er um tríggjar danskar lógir. „Lov om erhvervsfremme“
ásetir í § 10 reglur um mátieindir, mátihátt, eftirlit o.a. „Anordning
om metrisk mål og vægt“ ásetir hugtalslýsingar fyri mát og
vekt, og reglurnar um „Justerreglementet“ áseta galdandi rætt á økinum.
Talan er um at fylgja góðkendum altjóða mát- og vekteindum, og skal
føroysk lóggáva á økinum fylgja slíkum.
Fíggjarviðurskifti: Eitt starvsfólk á Arbeiðseftirlitinum hevur um
hendi uppgávurnar viðvíkjandi hesum lógum. 65% av arbeiðstíðini
fer til at røkja uppgávunar viðv. mát og vekt, og hini 35% av arbeiðsorkuni
verða nýtt til uppgávur hjá Arbeiðseftirlitinum.
Skulu vit røkja hesa uppgávu sjálvi, verður, umframt løn til eitt fólk,
talan um at gera íløgur í útgerð o.a. Økið er brúkarafíggjað, og tí standast
ongar beinleiðis almennar útreiðslur av, at økið verður føroyskt.
1.9. Ráevni í undirgrundini
L. nr. 181 af 08.05.1950 om efterforskning og indvinding af råstoffer i
kongeriget Danmarks undergrund.
A. nr. 259 af 07.06.1963 vedrørende udøvelsen af dansk højhedsret
over den kontinentale sokkel.
Fyrisitingarmyndugleikar: Fyrisitingarligur myndugleiki er Vinnumálastýrið,
(oljumáladeildin). Eftir løgtingslóg um kolvetnisvinnu frá
1998 kann Landsstýrið veita loyvi til forkanningar, leitingar og útvinningar
í sambandi við kolvetni á føroyskum øki, og kann seta eina
ørgrynnu av treytum í hesum sambandi. Danska undirgrundarlógin
frá 1950 kann gerast virkin, um talan verður um at gagnnýta annað
náttúrutilfeingi enn kolvetni, og var tað orsøkin til, at kolvetnislógin
ikki setti donsku lógina frá 1950 úr gildi. Lógin vísir til „Ministeren
for offentlige arbejder,“ (nú Orkumálaráðið), og DGU, (nú GEUS),
sum fyrisitingarmyndugleikar. Lógin skal tí verða lisin á tann hátt, at
Landsstýrið verður sett inn, har lógin talar um „regeringen.”
Lóggáva: Danska lógin frá 1950 er bert í gildi í Føroyum, tí í Danmark
er komin nýggj undirgrundarlóg frá 1981, við seinni broytingum.
Lógin tilskilar, at ráevni í undirgrundini í danska kongsríkinum
er ogn hjá danska statinum, og at danski staturin hevur einkarrætt til
leiting og útvinning av ráevnum o.s.fr. Fyriskipanin staðfestir danskan
yvirvaldsrætt yvir landgrunninum í sambandi við leiting og útvinning
av náttúrutilfeingi.