hvítabók • fylgibind 2 fyrisiting - Løgmansskrivstovan

Inngangur
Løgmansskrivstovan · 43
Løgmansskrivstovan hevur lagt arbeiðið til rættis við støði í tí arbeiðssetningi,
sum landsstýrismaðurin í sjálvstýrismálum lat Løgmansskrivstovuni
í oktober 1998.
Tilfarið er skipað soleiðis:
Í kapitli 1 verða niðurstøðurnar gjørdar. Niðurstøðurnar verða lýstar
út frá teim trimum høvuðskrøvunum, sum eru í arbeiðssetninginum,
nevniliga lýsing av og krøv til lóggávu, fyrisiting og fígging. Við hesum
høvuðskrøvum í huga verður farið ígjøgnum øll evnini, sum lýst
verða í álitinum, undantikið formliga og óformliga sambandið, sum
er millum Føroya og Danmarkar og millumtjóða sáttmálar, har niðurstøðurnar
verða skipaðar øðrvísi.
Í kapitli 2 verður samstarvið við Danmark lýst. Hetta verður gjørt út
frá donskum rættarreglum, sum eru settar í gildi í Føroyum, føroyskum
rættarreglum, sum vísa til danskar myndugleikar og formliga og
óformliga samstarvinum, sum er millum føroyskar og danskar myndugleikar.
Kapittul 3 lýsir tey mál, sum Danmark umsitur í dag, og sum á ein
hvønn hátt koma Føroyum við. Komið verður inn á málsetingar fyri,
nær málsøkini kunnu fáast at virka sum føroyskt málsøki.
Økini, har mælt verður til at gera samstarvsavtalur við Danmark ella
annað land, verða viðgjørd í kapitli 4.
Í kapitli 5 verða uppsettir teir millumtjóða sáttmálar, sum Løgmansskrivstovan
umsitir beinleiðis.