hvítabók • fylgibind 2 fyrisiting - Løgmansskrivstovan

3.3 Løgregla
Løgmansskrivstovan · 83
Føroyingar hava ongar royndir í at umsita sivilrættarligu lóggávuna.
Hildið verður tí, at talan kann verða um at avtala eina skiftistíð upp
á millum 1/2 og 1 ár við ríkismyndugleikarnar, alt eftir, hvussu væl
starvsfólkini, sum verða sett til at røkja uppgávuna, kenna økið. Hugsað
verður serliga um viðgerð av umsóknum um fría rættargongd.
Løgregla 1
Lógargrundarlagið undir løgregluni er í rættargangslógini – í Føroya
føri er talan um lóg nr 92, 23. februar 1988, serstakliga kapitlarnir
10 og 11. Her er ásett, at løgreglan og ákærumyndugleikin eru partar
av løgreglu og ákærumyndugleika ríkisins.
Kortini er ásett í rættargangslógini, at føroyska løgreglan er ein
deild fyri seg. Hetta ber við sær, at løgreglufólk, ið skulu virka í Føroyum,
verða úrvald til útbúgving úr Føroyum, og útgangsstøðið er, at
tey eftir lokna útbúgving einans kunnu virka í Føroyum, tó at starvsfólkaumbýti
kann vera í serligum førum, og í serligum støðum kunnu
eisini donsk løgreglufólk verða skipað í starv í Føroyum.
Føroyar eru annars egið løgrøgludømi, eins hini í ríkinum, tó við tí
frábrigdi, at kriminalløgreglan – eins og í Íslandi – ikki er ein deild
fyri seg; men lógargrundarlagið er ikki heilt eins, tí broytingar í Danmark
ikki av sær sjálvum koma í gildi í Føroyum. Herafturat koma so
onkrir tilætlaðir munir, m.a. at Føroya landfúti – mótsett poilitimeistarum
í Danmark – eisini hevur ríkisákæraheimild.
Uppgávurnar hjá løgregluni
Høvuðsuppgávan hjá løgregluni er sambært grein 108 í rættargangslógini
at varðveita trygd, frið og skil, og at gera tað, sum skal til, fyri
at forða brotsverkum og kanna tey.
Føroya landfúti, (politimeistarin), hevur so harumframt ríkisákæraheimild,
og fútin hevur ábyrgdina av at samskipa tilbúgvingina í Føroyum.
Aðrar høvuðsuppgávur
Umframt nevndu uppgávur liggja ymiskar sivilrættarligar uppgávur
1 Pettið um løgregluna er grundað á skrivligar upplýsingar, sum eru fingnar frá fútanum,
ársfrágreiðingini hjá løgregluni fyri 1997, heimasíðuni hjá løgregluni (http://
www.politi.dk), danska fíggjarlógaruppskotinum fyri 1999, virksemisroknskapinum hjá
løgregluni fyri 1997, heimasíðuni hjá íslendska Dóms- og kirkjuraðuneytinum (http://
brunnur.stjr.is/interpro/dkm/dkm.nsf/pages/forsida), og árbókini fyri Føroyar 1997.
Av tí at tilfarið er rættiliga umfatandi, er tað ikki prentað sum skjalatilfar, men er
tøkt í skjalagoymslunum á Løgmansskrivstovuni.