hvítabók • fylgibind 2 fyrisiting - Løgmansskrivstovan

340 · Hvítabók – Fylgibind 2
Kapittul 6
Føroyskar løgtingslógir annars á almanna- og
heilsuøkinum
Inngangur
Á almanna- og heilsuøkinum eru fleiri løgtingslógir settar í gildi uttan
formligar samráðingar við donsku stjórnina og eru sostatt ikki yvirtiknar
sum sermál. Sambært heimastýrislógini verður eitt málsøki
yvirtikið sum sermál sambært lista A eftir áheitan frá heimastýrinum
ella donsku stjórnini. Hetta verður tulkað soleiðis, at um ein slík yvirtøka
skal fara fram, skal heimastýrið formliga boða donsku stjórnini
frá, at tað vil yvirtaka økið.
Heimastýrið hevur sett lógirnar í gildi uttan at boða donsku stjórnini
frá, sum ásett er í heimastýrislógini.
Tey málsøki, sum eru yvirtikin sum sermál sambært § 2 í heimastýrislógini,
eru apoteksverkið, sum var yvirtikið sum sermál í 1948,
og vanlukkutryggingarøkið, sum var yvirtikið í 1980.
Bjálvingarstuðulslán til pensiónistar
Ll. nr. 40 frá 07.05.1991, seinast broytt við Ll. nr. 29 frá 14.02.1995.
1. Fyrisitingarligir myndugleikar og uppgávur
Fyrisitingarmyndugleikar sambært lógini eru Húsalánsgrunnurin,
Orkuráðið, Almannastovan, landsstýrismaðurin í almannamálum og
kærunevndin í almannamálum.
Húsalánsgrunnurin umsitur lógina og tekur avgerð um bjálvingarstuðulslán.
Grunnurin kann, um tað er neyðugt, útvega sær upplýsinger,
ráð og leiðbeining frá Almannastovuni. Undir Húsalánsgrunninum
er ein bjálvingarstuðulslánsgrunnur, sum fær játtan á løgtingsfíggjarlógini
á hvørjum ári.
Almannastovan hevur skyldu til at upplýsa Húsalánsgrunninum,
um umsøkjarin er pensiónistur, og um viðurskiftini hjá honum annars.
Landsstýrismaðurin í almannamálum hevur til uppgávu at gera