Njerëz që i dua - Gazeta Kritika

fytyrës një çehre të ngrysur. Kur mbyllte sytë unë ia lëshoja
krejt vendin dhe ulesha pranë Gonit, i cili atë ditë ishte i vetëm
në timon...
E ndjeja se diçka kishte në brendësi të atij njeriu,
hamendësoja mal më mal e fushë më fushë, e pyesja dhe merrja
ose heshtje ose ndonjë përgjigje që kishte brenda një farë
hermetizmi, një farë ndrojtje se po të çelej, diçka do t’i ndodhte.
Diku, kur autobusi mori të rrokullisë gomat në përdredhjet
e Vjosës, kur dielli kishte hequr tërë vellon e lumit, duke nxjerrë
në pah si shenjat e llumit mbi toka gjatë tejmbushjeve të ditëve
të dimrit, ashtu edhe kaltërsinë e ujit në një ditë prilli pa shi, ai
lëvizi nga vendi dhe u pamë sy në sy. Ndjeva se diçka kishte
ndodhur në jetën e tij, diçka që ia kishte ngrirë buzëqeshjen
dhe ia kishte prishur ëndërrat e jetës. Ndjeva se po çelej e po
lëpinte plagën e jetës, për ta ruajtur nga ndonjë infeksion i ri.
Porta e hekurt e kujtesës kërkëlliu mentesheve të ndryshkura
dhe u hap. U hap aq sa mund të futet një fëmijë skiç, aq sa të
dëgjohej një zë i përcjellë nga jehonat mal pas mali kur shuhet,
kur bie në fushë…
Kur e pashë tërësisht në dritë tek gjerbte kafen në Greshicë
të Mallakastrës, me mendje i dhashë moshën time apo disa
vite poshtë saj. Më tha se ishte 49 vjeç dhe se kishte lindur kur
unë filloja shkollën e mesme. Ishte i formuar si njeri, me dijen
dhe kulturën e dy universiteteve të kohës së kaluar, asaj kohe
që dikush e quan koha e diktaturës dhe dikush tjetër koha e
Enverit. Kishte punuar në kohën e parë si ekonomist dhe kishte
fituar përvojën e një njeriu të punës së ndershme. Në kohën e
dytë ishte marrë me tregti. Qënia i majtë në mendim e kishte
rrënuar. Tërë djersa dhe mundi i vet, i gruas, dy vajzave dhe
djalit, ishte shuar. Nuk kishin qenë pak, por dyqind milionë.
Kjo e kishte bërë që të rrëmbente familjen e të zbriste në brigjet
e Kretës për të punuar si bojaxhi…
“Të dyqind milionët i kam harruar”, - më tha dhe ofshani,
si të nxirrte nga vetja tymin e një zjarri që e digjte ditë për
ditë…
27