Njerëz që i dua - Gazeta Kritika

Spiro Kanaci eshte nga lagjja “Hoxhias” e Elbasanit, punon
në ndërtim. Është 40 vjeç. Fatos Merka është nga Zheba e
Skraparit. Elton Kullolli është nga Gramshi, i ri, tek të 25
pranverat. Ylli dhe Daut Brisku, që këtu i thërrasin Sokrat e
Kristo, janë nga fshati i përmendur i Korçës, nga Drithasi.
Kastriot Petriti është nga Tirana, kurse shoku i tij Gramos Merko
është nga Çorovoda në prehër të maleve të Skraparit. Xhimi
Jashari është sarandjot, mjeshtër në bojatisje, kurse Spiro Tota
është nga Himara, mjeshtër në ndërtim...
Pasiguria në punë, por edhe pengesat e mëdha për
legalizim, i kanë bërë ata që të jenë pranë njëri-tjetrit, ta pinë
kafen duke biseduar e lexuar gazetat që nuk mungojnë të vijnë
herë pas here në ishull, përfshirë edhe EMIGRANTI-n.
Problem edhe këtu është puna me dokumentet. Përpos
zvarritjeve të njohura si ajo “Paguaj paratë dhe mos merr leje
qëndrimi”, këtu ka edhe një vështirësi mbi të gjitha të tjerat.
Ishulli administrativisht varet nga Pireu. Që të bësh dokumentet
duhet të shkosh në Pire, të humbasësh ditë të tëra pune e
shpenzime të tjera qëndrimi. Disa kanë preferuar t’ua besojnë
lejeqëndrimin e tyre ndonjë avokati, pazari me të cilët i kalon
të treqind eurot për njeri... Kanë të drejtë emigrantët e Athinës
kur ankohen për zvarritjet burokratike për marrjen e lejeve të
qëndrimit. Por, në qoftë se ata do të dinë se sa vuajnë emigrantët
në ishuj për të njëjtën gjë, do ta ulnin zërin për vete për ta
bashkuar me zërin e bashkëvuajtësve të tyre. Në Hydra nuk
ka as edhe një bankë bujqësore ku të paktën atje të derdhin
paratë për siguracione, siç ndodh rëndom në sterë...
...Në mesditë, të çliruar nga “patkoi dhe nga vështrimi i
artilerisë ishullore të kapedan Miaulit, dalëngadalë e humbëm
Hydren nga sytë për ta ndalë vështrimin sërish në bregdetin e
Peloponezit, në ishullin Paros, Egjina, Salamina që në perëndim
të diellit flakërohen e marrin një pamje tërheqëse...
...Të bukur janë ishujt. Mua kjo m’u ngul në sy e në shpirt
ashtu siç m’u ngulën edhe hallet e banorëve të tyre të
përkohshëm, emigrantëve...
302