Pyeslər - Azərbaycan Milli Kitabxanası

B a ş r e d a k t o r. Nə oldu? Eşitmədiz?
K a t i b ə. Eşitdim.
B a ş r e d a k t o r. Deyin gəlsin.
K a t i b ə. Baş üstə.
Pauza.
B a ş r e d a k t o r (əsəbi). Nə oldu?
Katibə hər iki qolunu qaldırıb quş qanadı kimi yelləməyə başlayır.
(Özündən çıxır.) Yenə? Yenə başladız? Axı... axı, biz sizinlə danışmışdıq!.. Axı, siz
inanmışdız ki, quş deyilsiz!.. Siz söz vermişdiz!..
K a t i b ə (birdən özünə gələrək). Düzdür!.. Düzdür!.. Mən daha quş deyiləm! Qırqovul
deyiləm!.. Qırqovul meşədə olar!.. Çay qırağında olar!.. Əlbəttə!.. Bu saat!.. Bu saat!.. (Qollarını
aşağı salıb sevincək kabinetdən çıxır.)
B a ş r e d a k t o r (dərindən nəfəs alır). Çətindi!... Vallah, çox çətindi...
Siyasi icmalçı kabinetə girir.
S i y a s i i c m a l ç ı. Icazə olar?
B a ş r e d a k t o r. Bəli, buyurun, əyləşin.
S i y a s i i c m a l ç ı (ona yaxınlaşaraq). Əvvəlcə gəlin salamlaşaq. Mən elə hesab edirəm ki,
bu tarixi bir görüşdür! Xəstə tələsər, amma armud vaxtında yetişər! Bax, indi həmin vaxt gəlib çatıb!
Armud yetişib!
B a ş r e d a k t o r (təəccüblə). Hansı armud?
S i y a s i i c m a l ç ı (diqqətlə Baş redaktora baxaraq əlini uzadır). Salam əleyküm!
Pauza.
B a ş r e d a k t o r (ayağa qalxaraq Siyasi icmalçı ilə əl tutuşur). Əleyküm salam...
Əyləşin...
Pauza.
Siyasi icmalçı Baş redaktorla üzbəüz əyləşir.
Sizin mənimlə söhbətiniz var, demişdiz, yadımdadı... Ancaq istəyirəm əvvəlcə mən bir neçə
kəlmə deyim... (Qarşısındakı materiala işarə edir.)
S i y a s i i c m a l ç ı (Baş redaktorun qarşısındakı elə həmin materiala işarə edərək). Belə
hesab edirəm ki, söhbətimiz eyni olacaq...
B a ş r e d a k t o r. Vallah, bilmirəm siz nə söhbəti deyirsiz, ancaq doğrusu... mən sizin (Yenə
qarşısındakı materiala işarə edir.) bu beynəlxalq icmalınızı, bir az yumşaq desəm, yaxşı başa
düşmədim...
S i y a s i i c m a l ç ı (həyəcanla). Armud!
B a ş r e d a k t o r. Necə yəni armud?
S i y a s i i c m a l ç ı. Armud də! Soruşmurduz ki, hansı armud?
232