Pyeslər - Azərbaycan Milli Kitabxanası

Q o n ş u. Nə?
K i ş i (öz-özünə).
Dünya gözəldir...
Həyat gözəldir...
Q o n ş u. Eşitmirəm e?..
K i ş i (Qonşuya baxa-baxa öz-özünə davam edir).
Bircə qanmaz var...
O da ki, sənsən...
Q o n ş u. Hə? (Kişinin qoluna girir.) Bura bax, bilirəm, işin çoxdu, amma mən ölüm, qonşu,
otkaz eləmə, al bu üç min dolları (Səksəkə ilə ora-bura baxa-baxa arxasında şalvarının qayışının
altında gizlətdiyi konverti çıxarıb Kişiyə tərəf uzadır.), bir dənə balaca bilərzik var dükanda, gedək,
beş dəqiqəyə, götür onu mənimçün!..
K i ş i. Yenə Laçınova rüşvət verirsən?
Q o n ş u. Yavaş! Yavaş, a kişi! Belə şeylərlə zarafat eləmək olmaz! (Yavaşdan) Yox, bu
rüşvət deyil!..
K i ş i. Bəs nədi?
Q o n ş u. Başqa məsələdi...
K i ş i. Nədi axı?
Q o n ş u (yenə ehtiyatla o tərəf-bu tərəfə baxır). Canan məsələsidi...
K i ş i. Nə?
Q o n ş u. Canan!..
Pauza.
Adı bilirsən nədi? Dezdemona!..
K i ş i. Bəs sənin o boyda arvadın var...
Q o n ş u. Nolsun?
K i ş i. Necə yəni nolsun?
Q o n ş u (məzəmmətlə). Ay qonşu!.. Ay qonşu!.. (Eləcə ehtiyatla o tərəf-bu tərəfə baxır.
Yavaşdan) Arvad arvad olur bir il, iki il, üç il, sonra dönür olur bacı!..
Pauza.
K i ş i. Yox! Bu day lap ağ oldu! Sənin adamuşkava da bilərziyi mən almalıyam?
Q o n ş u. Bəs necə? Sən kişi adamsan də, sənə etibarım var! Eşitməmisən, qonşu qardaşdan
irəlidi? Mən öz mənəvi aləmimi sənə etibar edirəm!
K i ş i. Bilərzik almaq mənəvidi? Maddidi bu, maddi!
Q o n ş u. Əşşi!.. Özün də oxumuş adamsan, bilmirsən ki, maddi olmayan yerdə mənəvi nə
qələt eləyir?
K i ş i. Yox, bilmirəm, heç nə də gedib almıram! Bir dəfə dedin ki, maşını öz adıma alım,
iyirmi min dollara,–iyirmi min e!..–dedin rüşvət verirəm Laçınova...
Q o n ş u. Yavaş...
K i ş i. Aldım, o maşının heç üzünü də görmədim... Bir dəfə on min dollar verdin ki,
Laçınovun arvadının ad günüdü, brilyant komplekt götürdüm səninçün!.. Bir dəfə səkkiz min dollar
verdin ki, Laçınovun...
Q o n ş u (tələsik onun sözünü kəsir). Yavaş, eşidər!..
K i ş i (yan-yörəsinə baxır). Kim eşidər?
257