Revista (PDF) - Universidade do Minho

NÓS E A EUROPA 111
«pinheiros». Das gentes de Nós revisitaremos, nalguns seus textos
significativos, só as suas figuras mais eminentes: fugazmente, Risco;
e logo, com mais vagar, Pedrayo e Castelao.
Para começar, tomaremos o ensaio «Nós, os inadaptados» 13 em
que Risco, fazendo memória e balanço em 1933 do percurso seguido,
traça a biografia intelectual 14 dos, nas suas palavras, «homes do
seu tempo» 15 . O retrato e evoluçom colectivos que esboça som válidos,
sobretodo, para ele mesmo e Pedrayo e, em menor medida, para
Castelao. Interessa-me assinalar que essa caracterizaçom nom acai a
todo o galeguismo da época, pois naquela altura havia outros nacionalistas,
os das Irmandades da Fala, a quem acabará achegando-se
Castelao, que professavam um outro «europeísmo», eminentemente
político e nom meramente cultural 16 .
Pois bem, no ensaio de Risco, o que de Europa está presente é a
sua «cultura humanística», que eles teriam tomado, de entrada, para
a formaçom e cultivo de si, das suas personalidades individuais, e
despois teriam transferido, ao darem eles com Galiza e darem-se
a Galiza, para a cultura galega. Sob o rótulo «cultura europea» o que
achamos é, fundamentalmente, arte, literatura e pensamento, que
procedem, tamém fundamentalmente, do mundo francés e do alemám,
os quais mesmo servem, sobretodo a francesa, como filtros de
outras culturas 17 . Tamém cumpre registar pegadas, de importáncia,
——————————
13 Vicente Risco, «Nós, os inadaptados», in Nós, tomo 10, n.º 115, Ourense-
Santiago, 1933, pp. 115-123. Cito pola ediçom facsimilar: Nós, vol.V (1932-1933),
Galaxia, Vigo, 1980.
14 O assunto é, ao nosso ver, o accesso à autoconsciéncia: L. G. Soto, «Galeguismo/Nacionalismo:
da autoconsciéncia à autodeterminación», in Aula Castelao
(eds.), Filosofía e Autodeterminación, XVI Semana Galega de Filosofía, Pontevedra, 1999,
pp. 32-42.
15 Pouco antes, Risco aclarara que nom partilhava a «teoria hestórica das geraciós»
de Ortega (Nós, p. 115).
16 Basta lembrar algo do «curriculum» do que foi o seu presidente, J.V. Viqueira:
formado na Sorbona e várias universidades alemás, foi aluno de Bergson, Cassirer,
Stumpf, Simmel, Husserl, Riehl, Dessoir, Rupp, Müller e Wundt, entre outros. Entre as
suas obras, estám traduçons do alemán, de Natorp e de Vorländer, e do inglés, de
Berkeley e de Hume.
17 «O francés era d’aquela a úneca lingua estrangeira que coñecíamos ben, anque
n-aquil tempo da nosa mocedade, por eiquí en Galiza, a mais moda era o inglés»
(Nós, p. 116). Do seu achegamento à cultura alemá, dá-nos umha idea o seu livro sobre
a sua viaxe a Alemanha em 1930: V. Risco, Mitteleuropa, Nós, Santiago, 1934 (Galaxia,
Vigo, 1984, 2.ª ed.).