Revista (PDF) - Universidade do Minho

84
DIACRÍTICA
Tratados de Prisciliano – hai tamén versión española e holandesa-,
pero coas mesmas dificultades inherentes ás outras versións, respecto
ó texto latino e á súa intelixibilidade.
Finalmente, aproveitando a circunstancia do xacobeo-99, os hirmáns
Chao Rego 22 – Ramón e Xosé –, veñen de agasallarnos con
cadan seu libro sobre Prisciliano. No primeiro deles, en orde de aparición,
– O camiño de Prisciliano –, R. Chao tenta reconstruir, de forma
histórico-novelada, o camiño de Prisciliano (o regreso á terra verde do
fin do mundo) desde Chartres ata Fisterra-Santiago-Lugo, pasando por
unha morea de cidades de Francia e de España nas que sempre vai
atopando algún informador, máis ou menos experto nos avatares da
vida de Prisciliano. Á saída da catedral de Chartes bate cun grupo
de italianos de Florencia que, descalziños, ían cara o fisterra galaico;
feito que provoca a pregunta e a resposta inmediata: «¿E como quere
vostede que captemos as vibracións e máis o magnetismo telúrico que
deita baixo o camiño das estrelas, se non é descalzos? Dende hai
milleiros de anos (…), moito antes dos desplazamentos históricos a
Compostela para veneraren a Prisciliano, as almas inquedas de Europa
ían á fisterra seguindo a Vía Láctea. En cada lugar sagrado erguían
templos, que os cristiáns trocaron en igrexas. ¿Permíteme dicirlle que
ningunha superstición popular causou tantos desastres coma os que
forneceu a católica? Hai a quén lle da por dicir que ésta compensou
as obras destruídas con outras que ela inspirou. Se a vostede lle acae
este razoamento, faga o posible para que se beneficien tamén diso as
relixións naturais que rexorden agora»…Trátase, como se pode colixir,
dunha novela histórica na que, aporveitando a documentación existente
sobre Prisciliano, re-crea a viaxe polo camiño de Santiago
(preguntándose o autor: ¿ é éste o suplantador?), na procura do alento
de Prisciliano, personaxe mítico, simbólico, conservado na memoria
individual e colectiva.
X. Chao, pola súa banda – Prisciliano, profeta contra o poder –
reconstrúe, a modo de ensaio, a vida e a obra de Prisciliano, procurando
a reivindicación da súa figura fronte á orde establecida, fronte
——————————
22 CHAO, R., O camiño de Prisciliano, Espiral Maior, A Coruña, 1999. CHAO, X., Prisciliano,
profeta contra o poder, A Nosa Terra-Vigo, 1999. – No intre de redactar estas
páxinas chégame a referencia da recentemente publicada História do Pensamento Filosófico
Portugués – Volume I, Idade Média – (Direcçäo de Pedro Calafate), Editorial
Caminho, Lisboa, 1999. A Paula de Oliveira e Silva débese o estudio da controversia
ariana e do priscilianismo, amosando –como expresión inaugural dunha cultura – as
perplexidades da súa problemática herexía, e as tensións entre ortodoxia e heterodoxia.