Revista (PDF) - Universidade do Minho

236
DIACRÍTICA
A respeito do escravo, além de precisar aquela sua condiçom –
assinalada na Étc.Nic. – de «instrumento animado» (1161b3), na
Pol., Aristóteles examina e assume, nom sem reparos, a justiça da
escravitude 9 . Segundo precisa, em I/4, o escravo é «um subordinado
para a acçom» (1254a8), entendendo o tal subordinado como «um
instrumento (antes) dos instrumentos» (1253b33): por outras palavras,
o escravo é umha «possessom» e, como tal, «um instrumento para
a acçom» (1254a16-17). Por outra parte, a possessom do amo e a
pertença do escravo é justificada, no cap. 5, polas diferenças naturais
(em concreto, psíquicas) existentes entre os humanos: tais diferenças
fam que «por natureza» sejam «uns livres e outros escravos» (1255a1),
sentenciando Aristóteles que para estes é à vez «conveniente e justa
a escravitude» (1255a2). Contodo, segundo logo reconhece no cap. 6,
existe porém escravitude injusta, ja que em algumhas ocasions
«nom som por natureza, uns, os escravos e, outros, os livres» (1255b5)
senom que som tais «convencionalmente e por violéncia» (1255b15).
Nestas condiçons, nom se dam o «interesse e amizade recíprocas» que,
segundo ele, existiriam entre o amo e o escravo que o som «por natureza»
(1255b12-14). Obviamente, esta «amizade» hai que entendé-la
cos caracteres restritos que vimos na Étc.Nic., em VIII/11. Além disso,
na Pol., esses «interesses comuns» resultam ora muito matizados, e
implicitamente negados, em III/6 (1278b32-37) ora abertamente
negados em VI/2 (1317b13).
A respeito da mulher 10 , na Pol., Aristóteles rubrica a sua inferioridade
natural, que tem como consequéncia a sua subordinaçom ao
home. Assi, em I/5, contemplando «a relaçom do macho coa fémea»
afirma que «por natureza é o primeiro superior e a segunda inferior»
e que, por tanto, «o primeiro rege e a segunda é regida» (1254b13-14).
Ora, apesar de formulada em termos tam físicos (macho/fémea), a
diferença entre o home e a mulher é ao cabo, sendo por suposto
natural, de índole psíquica. Coa mulher passa, mais ou menos, o que
——————————
9 Num exame mais demorado e pormenorizado, haveria que entrar, seguindo ao
estagirita, na análise da «violéncia» e a sua relaçom coa virtude. Como aproximaçom
ao contexto, é interessante a achega geral: F. D’Agostino, Bia. Violenza e giustizia nella
filosofia e nella letteratura della Grecia Antica, Giuffrè Editore, Milano, 1983, en especial
os capítulos «Bia e Hybris», «Bia contro Dike» e «Bia con Dike», pp. 21-34, pp. 35-50
e pp. 51-66.
10 Um intento curioso de salvar o «politicamente incorrecto», acerca das mulheres
e dos escravos: A. Cauquelin, Aristóteles, Jorge Zahar Editor, Rio de Janeiro, 1995,
pp. 105-113.