Is Pregadorias antigas: su signo de sa devozioni - Provincia del ...

Comune di Gonnosfanàdiga
Última dí
Unu de is médius prus eficatzis po otènniri larga misericórdia de Deus est cudhu de
assigurai s’eterna felitzidadi coment’e Luxia cun su versai in manus de is pòberus
generosas limósinas duranti sa vida nosta; mentras is limósinas fatas in vida sunti
medas prus meritórias de cudhas fatas in morti. E de fatu cali méritu est mai cudhu,
narat S. Basíliu, de torrai a Deus su chi non podeus portai a s’eternidadi? Ita caridadi
su bolli beneficai candu prus non seus tra is biventis? Serbat po nosu de ammaestramentu
su consillu chi Luxia iat donau a sa mamma e chi iant s’una e s’àtera praticau
fielmenti est a sciri de nosi privai in vida de is terrenas commodidadis po sucurri is
òrfanus, e is pòberus de Gesugristu. Est custu s’avertimentu chi nosi donat s’Ispíritu
Santu in s’Eclesiàsticu; poita in custu modu sa limósina at a èssiri prus atzeta a Deus
e prus útili a is ànimas nostas, is calis ant a èssiri sèmpiri avaloradas po triunfai de is
Pascàsius de custu mundu e gosai cun Luxia su prémiu de un’immarcescíbbili corona
de glória riservada a chini cumbatit po difèndiri sa càusa de su Signori.
Oratzioni
O ínclita Eroina de sa fidi Luxia, nosu eus ammirau in totu su cursu de custa novena
s’immensu isplendori de is virtudis bostas cun is calis bosi seis fata ammiràbbili a is
ogus de su celu e de sa terra: Bosu scieis chi sa lei de is afetus nostus est sèmpiri in
contradditzioni cun sa lei de is obbligatzionis nostas chi su prus de is bortas nos allontanant
de su camminu de sa virtudi. Ballat a favori nostu sa glória chi gosais ananti de
Deus e su patrocíniu bostu de su cali si glóriat de tantus annus custa bidha produsat
sèmpiri in nosàterus frutus de beneditzioni. Bosu difendeinosí in is perígulus, agiudainosí
in is netzessidadis, consolainosí in is aflitzionis. A Bosu ricurreus in is trabballus,
in is maladias, in modu spetziali po sa cura de is ogus, e su grandu númeru de is pellegrinus
chi concurrit a custa festa dimostrat sa grandu cunfiantza de is divotus bostus e
su grandu poteri de s’intercessioni bosta. Sunti 16 séculus chi s’ànima bosta est bolada
in cumpangia de is àngelus a ocupai ispléndidu tronu in su celu, e chi sa Religioni at
dedicau a su nòmini bostu una pàgina gloriosa in sa stória; ne s’andai de is tempus at
pótziu scemai su cultu, s’amori e s’entusiasmu de su pópulu cristianu, chi ndi cèlebrat
dogn’annu cun plàusu sa religiosa memória. Arribbaus po tantu a sa conclusioni de
custa divota pràtica, non lassaus de invocai sa protetzioni bosta asuba de su giardinu
floriu de sa crésia católica. Protegei cun assídua premura sa Tzitadi Santa, e cun issa in
particulari su sapientíssimu Lioni, po chi de sa tumba de su piscadori distendat a dogna
natzioni eficacíssimu impériu e circundai de bellus triunfus sa becesa sua veneranda.
Protegei is magnatus de custa bidha e cunservai sèmpiri generosu su coru insoru po chi
is bènis materialis dhis serbant de médiu po dhis assigurai s’eterna saludi. Prosperai is
famíglias insoru in modu chi sèmpiri ricopint de bosu su santu timori de Deus e su
candori de is costúminis. Protegei is massajus, is pastoris, is artesanus benedixendu is
trabballus insoru e fendu chi su celu dhis protzat beneditzionis, e dhis portit sa terra
copiosíssimu frutu. Protegei is pòberus afligius e su nòmini santu bostu produsat in
dogna coru una porta a sa misericórdia e a sa cumpassioni. Protegei totu is festajolus,
siant de bidha o de foras, chi bosi [ant] sciógliu is votus po is gràtzias oténnias de
157