Is Pregadorias antigas: su signo de sa devozioni - Provincia del ...

282
IS PREGADORIAS ANTIGAS - SU SIGNU DE SA DEVOTZIONI
Oratzioni a Maria Santíssima
Santíssima Vírgini Maria! Già chi Bosu in sa solennidadi de sa Presentatzioni Bosta in
su Templu fiais tantu concentrada in sa profunda umilidadi Bosta, chi nemmancu Bosi
passat in idea de pòdiri èssiri Mamma de su Divinu Messias, nainosí de gràtzia calis
fiant is sentimentus Bostus asuba de custu puntu capitali, asuba de su cali non podiais
non pensai meda e de continuu. Si Bosu etotu no Bosi dignais de nos abèrriri su coru
Bostu, chini mai at a pòdiri penetrai in cussu augustu Santuàriu de s’Ispíridu Santu! E
ecu chi Bosu dhu revelais a vàrias devotas personas po edificatzioni nosta e po glória de
Deus. Dèu, nais Bosu, mi creia sa prus vili creatura e sa prus indigna de sa gràtzia
Divina, e po cussu dha dimandaia cun contínuas oratzionis. Dèu disigiaia de mi agatai
in vida a sa bennida de su Messias, po pòdiri fai sa serbidora a cudha afortunada
Vírgini chi depiat èssiri Mamma de Issu; e pregaia chi Deus mi cunservessit is ogus po
dha biri; sa língua po dh’alabai, is manus e is peis po dha serbiri, is genugus po adorai
in su sinu de Issa su Divinu Fillu Suu. Aici eis fatu sciri a Santa Brígida, e a Santa
Elisabeta Vírgini benedetina e po mesu de issas a nosàterus, e po cussu medas gràtzias
torraus a sa dignatzioni Bosta. O biada! Si seis ammiràbbili in su puríssimu amori a sa
Virginidadi, non seis mancu ammiràbbili in sa profunda Umilidadi Bosta. O bella unioni
de Virginidadi e de Umilidadi! Cun sa suavi fragràntzia de custas virtudis eis plàxiu
immensamenti a su Babbu celestiali, e de su sinu Suu nd’eis tirau su Verbu Eternu a su
castíssimu sinu Bostu. Ah! s’amori a custas ammiràbbilis virtudis infundei, o Maria, in
is corus nostus, po chi adornaus e fatus dignus nosi potzais presentai cun is maternas
manus Bostas in su Templu de sa glória, a su Tronu de sa Divina Magestadi.
Unu Babbunostu, tres Ave Marias, unu Gloria Patri.
Otava dí
In s’oferta chi sa Virginedha Maria intrendu a su Templu fait de Sèi etotu, non solamenti
proponit de abbarrai inní po totu sa vida Sua si aici plaxit a su Segnori, cun votu de
perpétua Virginidadi, ma s’ispollat ancora de totu su chi dhi apartenit de custu mundu.
Sa boxi de Deus dhi narat internamenti comenti fiat iscritu in su Salmu de su Reali
Ajaju Suu Dàvidde (psal. 44): Ascurta, o Filla, e mira, e inclina a mei s’origa de su
coru tuu, e iscaresci su pópulu tuu, e sa domu de Babbu tuu. Maria ascurtat atentamenti
custa Divina boxi, e cun totu perfetzioni dha cumplit. Lassat is bènis esterioris e sa
eredadi de is magioris Suus e si fait pòbera de ispíritu. Si separat de su Babbu e de sa
Mamma, is prus caras personas chi teniat asuba de sa Terra, e fait unu sagrifítziu de sa
amorosa cumpangia insoru. Renúntziat a is commodidadis e dultzuras de sa domu paterna,
po bíviri vida mortificada e penitenti in is apartamentus de su Templu. S’ispollat
de sa libbertadi e voluntadi Sua po ligai s’ispíritu e su corpus e sa disciplina de sa domu
de Deus, e po istai sugeta a is féminas antzianas de su logu santu, e a is ordinatzionis de
is Sacerdotus, e dipendenti interamenti de sa voluntadi insoru. Insumma custu est unu
sacrifítziu interu e de dógnia parti perfetu; e in mesu de sa festiva pompa e de s’allirga
solennidadi de sa Presentatzioni e de s’oferta in su Templu, sa Pipiedha Maria est una
vítima immolada cun mística incruenta morti a Deus.
Unu Babbunostu, tres Ave Marias, unu Gloria Patri.