Is Pregadorias antigas: su signo de sa devozioni - Provincia del ...

552
IS PREGADORIAS ANTIGAS - SU SIGNU DE SA DEVOTZIONI
Segunda dí
Si, Maria finas de su primu instanti de sa cuncetzioni sua tentu iat un’integridadi
perfeta, e unu gradu totu nou de puresa, e de innocéntzia originali introdúsiu iat
in su mundu, non dh’iat issa pótziu fai de sèi etotu, ne po is méritus suus; mentras
sa creatura calisiollat issa siat, non podit fai, ne merèsciri de sèi etotu cosa nisciuna
a sa preséntzia de Deus, poita de própriu non tenit issa àteru che su nienti.
Fiat istétia però totu sa gràtzia libberalíssima de su Deus Redentori, chi at pervéniu
a Maria, e preservada dh’at Immaculada, po chi nemmancu un’istanti manciada
fessit de sa culpa originali a sa cali coment’e filla de Adamu depiat ancoras
issa aturai sugeta.
No, no est beru, chi su narri Maria cuntzebida sentza culpa, siat unu diminui su
valori de sa Redentzioni de Gesugristu, est antzis unu rendiridha prus gloriosa.
De Gesugristu comunu Redentori, fiat redímia ancoras Maria, e cun su sànguini
suu puríssimu riscatada e preservada. Ne podiat èssiri de mancu. Ma issa fiat
istétia redímia de sa culpa inantis chi ndi fessit isclava, a diferéntzia de is àterus
totus, chi riscataus sunt istétius pusti de ai provau sa sclavitúdini; fiat istétia
riscatada, poita ligada non fessit de is comunas cadenas, e libberada poita non
fessit manciada de sa corrutzioni generali. E su pretziosíssimu sànguini de Gesugristu
chi balit a nosàterus po èssiri de is màncias giai contraidas purificaus,
bàliu fiat a Maria po no ndi contrairi mai nisciuna. Oh meravigliosa! Oh Etzelenti!
Oh potentíssima redentzioni de Gesugristu.
Un Pater, tre Ave, un Gloria.
Oratzioni a Deus Redentori
O potentíssimu Redentori de is óminis! Chini at a pòdiri mai dudai, chi tantu
copiosa, e perfeta non siat istétia sa Redentzioni bosta, chi non solamenti libberau
apat su géneru umanu de is culpas giai contraidas, ma preservau apat ancoras
calincun’ànima privilegiada de non ndi contrairi mai nisciuna? Si, Divinu Redentori!
Fiat dépia a s’ecessu de is infinitus méritus bostus; fiat dépia a s’illimitada
virtudi bosta, chi is tempus totus abbratzat passaus, presentis, e beniderus;
fiat dépia a s’infinita santidadi bosta, chi estremamenti ódiat dogna pecau: fiat
dépia dèu naru a Bosu sa glória de ai bintu sa morti de su pecau inantis ancoras,
chi issa intrada fessit in d-un’ànima solamenti; e fiat dépia non solamenti sa glória
de sullevai s’ómini giai arrutu, ma de sustènniri ancoras, e preservai a calincunu
po chi non fessit arrutu mai. Nosàterus cunfessaus cun alligria, chi a bosu veramenti
apartenit custa glória o Gesús Redentori nostru, e po cunseguéntzia cun
trasportu de amori bosi dha tribbutaus. Est custa sa glória de unu Redentori perfetíssimu,
e onnipotentíssimu comenti seis bosu, est custa sa glória de una Redentzioni
sa prus etzellenti, sa prus nóbbili, sa prus digna de Bosu. Ma custa
Redentzioni apuntu est chi Bosu a calincuna única creatura solamenti in summu
gradu privilegiada eis in is sapientíssimus decretus bostus riservada. Chini duncas?
Cali at a èssiri custa creatura tantu fortunada si no Maria?
Un pater, tre Ave, un Gloria.