Is Pregadorias antigas: su signo de sa devozioni - Provincia del ...

248
IS PREGADORIAS ANTIGAS - SU SIGNU DE SA DEVOTZIONI
nosàterus aici maestosamenti annuntziaidhas. Fei de prus, o Unu e Trinu Deus, chi
siaus dignus de nosi ndi gloriai in custa vida transitória e in sa vida eterna.
Unu Babbu nostu, tres Ave Marias, unu Gloria Patri.
Oratzioni a Maria Immaculada
Puríssima Vírgini Maria! Ecu chi su Celu e sa Terra, Deus e is Óminis, su Testamentu
antigu e su nou, dógnia edadi e dógnia língua, su magistériu infallíbbili de sa Crésia
Católica, e ancora s’inferru po confusioni e ignomínia sua, proclamant sa glória de sa
Immaculada Concetzioni Bosta. Nosu eus considerau devotamenti is títulus sublimis
po is calis Bosu possedeis glória tantu bella; títulus chi sunti tantus mistérius de
saludi e de consolatzioni po nosàterus. E arribbaus imoi cun custas pias e salutaris
cunsideratzionis a ndi celebrai sa festiva solennidadi ecu chi nos agataus ingiriaus de
su resplendori de custa glória Bosta e de sa celestiali allegria chi de Bosu puríssima
provenit, e spandendusí po dógnia parti, commovit cun santa cuntentesa totus is corus.
Ma cali profetu a nosàterus si conservaus ancora un’ànimu inclinau a sa corrutzioni
de su pecau, a certa secreta supérbia, a certas sensualis diletatzionis, a certu
amori mundanu, a certus atacus disordinaus a nosàterus etotu e a is àteras creaturas?
Cali combinatzioni nci podit èssiri inter sa sublimi puresa Bosta, o Immaculada, e sa
ignominiosa corrutzioni e brutesa nosta? Ma non podeis Bosu, o Maria, fai penetrai
unu bivu raju de sa luxi Bosta in su prus secretu de is corus nostus po dhus purificai
totalmenti? Ah! si nosu bolleus, Bosu podeis certamenti, poita chi custa virtudi illuminadora
e purificadora Bosi est cuntzédia de sa Trinidadi augustíssima, a sa cali
Bosu seis tantu atzeta e tantu cara. Imoi ecu chi nosu dhu bolleus. Si, in custa sagrada
solennidadi Bosta, o Maria, dhu bolleus sintzeramenti e fortementi. Non prus atacus
de amori própriu, non prus brutesa de pecaus. Bosu, Abbogada e Mamma nosta, seis
puríssima; e nosàterus bolleus cun dógnia puresa de ànima e de corpus fainosí dignus
Fillus Bostus. Bosi presentaus po tantu is corus nostus. Pigai, o Maria, a dhus purificai
cun is virginalis manus Bostas, a dhus cambiai, a nc’infúndiri sa luxi Bosta, e
fatus aici dignus presentaidhus a su Divinu Fillu Bostu Gesugristu, po chi siant in
eternu a Issu po mesu Bostu consagraus.
Unu Babbu nostu, tres Ave Marias, unu Gloria Patri.
Creu 352
Creu in d-unu Deus, Babbu totu poderosu, Criadori de su Celu e de sa Terra, in
Gesugristu Fillu suu Únicu Signori Nostru, su cali est istétiu cuntzebiu po òpera de
s’Ispíritu Santu, est nàsciu de sa Vérgini Santa Maria, at patiu asuta su poteri de
Póntziu Pilatu, est istétiu crucificau, mortu e sepultau, est abasciau a is inferrus e
pustis tres dis est risuscitau de is mortus, est artziau a is Celus, innoi s’est sétzidu a sa
manu dereta de su Babbu totu poderosu e de inní at a benni a giudicai is bius e is
mortus. Creu in s’Ispíritu Santu, sa Santa Crésia Católica, sa comunioni de is Santus,
su perdonu de is pecaus, sa resurretzioni de sa carri, sa vida eterna. Aici siat.