Is Pregadorias antigas: su signo de sa devozioni - Provincia del ...

Comune di Samassi
Adamu. A Bosu infati recurrint totus de una estremidadi de su mundu fintzas a
s’àtera, is piticus e is mannus, is ignorantis e is dotus, su sessu débbili e su
forti, is domus privadas e is púbblicus istabbilimentus, is campagnas e is Citadis,
is Pópulus e is Natzionis, e insumma totu sa Crésia isparta de s’Orienti a
s’Ocidenti. Is chi prangint si cunfiant in Bosu, e deponint in su sinu Bostu is
làgrimas insoru po èssiri de Bosu consolaus. Is chi gosant oferint a Bosu sa
prosperidadi insoru po èssiri de Bosu beneditus. De dógnia língua ispuntat dulcíssimu
su Nòmini Bostu cun su Nòmini de su Salvadori Gesús; e in dógnia
coru est isculpia sa santa idea de Bosu. De Bosu in dógnia necessidadi si circat,
de Bosu in dógnia avenimentu si rexonat, a Bosu in dógnia ora de sa dí e de sa
noti si prestant reverentis ossécujus, e cun su Nòmini Bostu e bàsciu sa protetzioni
Bosta si elevant in dógnia àngulu de sa terra pacíficus Altaris. E cali
àtera Reina nc’est mai o tantu piedosa e benéfica, o tantu ecelsa e gloriosa, e po
cussu tantu venerada e amada, cantu seis Bosu in totu s’universu? Ah! Bosu
seis veramenti s’allegria de su mundu, s’onori de su géneru umanu, sa glória
singulari de sa Crésia. E cantu prus is séculus procedint in su cursu insoru,
tantu prus Deus si gloríficat in Bosu, tantu prus Bosu cumpareis potenti e gloriosa,
e tantu prus su mundu Bosi onorat e in Bosu isperat e si consolat. Poita
chi comenti su Segnori Bosi at elígiu po donai a su mundu su Salvadori chi est
s’Autori de totus is gràtzias, aici, essendu Deus chi non si càmbiat, bolit chi
Bosu siais sèmpiri cun Issu remédiu e saludi, e consolatzioni e allegria; e tantu
prus siais tali cantu prus crescint is mali e is bisòngius de custu mundu. Custa
est sa misteriosa Maternidadi, po sa cali Gesús morendu in sa Gruxi Bosi iat
donau in sa persona de s’amau discípulu totus is óminis po dhus regòlliri bàsciu
su piedosu mantu Bostu. Custu est su cumplimentu de s’ammiràbbili profetzia
Bosta chi totus is generatzionis Bosi iant a proclamai beata po is grandus
cosas chi s’Onnipotenti iat ai operau in Bosu. Si, o Maria, Bosu seis sa beata po
ecelléntzia, poita chi cantu prus seis istada úmili e disconnota, tantu prus su
Segnori Bosi at magnificau e esaltau. E a imitatzioni de su chi at fatu cun s’Unigénitu
Suu e Bostu, at donau ancoras a Bosu unu Nòmini, chi apustis de su
Nòmini Santíssimu de Gesús, est asuba de totus is àterus nòminis; e dógnia
língua cunfessat, chi Bosu esaltat in is Celus asuba de totus is creaturas, seis a
sa dereta de Fillu Bostu, glorificada cun Issu, e fata Mama e Abbogada de is
óminis e Reina potentíssima de s’universu. Bosi saludu duncas, o gloriosíssima
Reina, chi seis a su própriu tempus Mama de misericórdia e de gràtzia! Bosi
saludu, o santa Mama de su Summu Redentori Gesús, o bella Sperantza, o dulcíssima
Consoladora de is óminis! A Bosu, o Benedita, chi in su prus altu de is
Celus regnais cun Gesugristu, de custa bassa terra is esiliaus fillus de Adamu
tzérriant e suspirant. A Bosu tzerriaus e suspiraus nosàterus chi cun su lati vivificanti
de sa devotzioni Bosta eus cumentzau sa vida e dha boleus po sèmpiri
continuai. Ah! Bosu custodeinosí, protegeinosí, santificainosí; e fei, o Maria,
chi de su summu Gesús, frutu beneditu de su sinu Bostu, siaus totus dignus
discípulus in custa Terra, e apustis beatus comprensoris in su Celu. Aici siat.
Unu Babbunostu, tres Ave Marias, unu Gloria Patri.
313