Is Pregadorias antigas: su signo de sa devozioni - Provincia del ...

572
IS PREGADORIAS ANTIGAS - SU SIGNU DE SA DEVOTZIONI
Ah! benedita sa manu bosta! Beneditu su Coru bostu! Aici dhus èssi iscipius connòsciri!
Mi iap’a èssiri acuistau grandus méritus po s’eternidadi ma poita in is tribbulatzionis
no apu tentu passiéntzia, apu sunfriu ma sentza utilidadi, e sentza méritu…
Considera de prus, o ànima mia, chi Gesús si rassignat a patiri in sa manera chi bolit
su Babbu. Unu solu suspiru de su Coru de Gesús fiat bastanti a reparai sa glória de
Deus, e riscatai su mundu. Ma su Babbu celestiali at bófiu chi custu Coru sunfressit
is doloris e is angustias prus mannas, at bófiu chi morgessit e abbandonau in d-una
gruxi. E Gesús totu si abbratzat nisciunu abborrescit de is patimentus ordinaus a issu
de s’Eternu Babbu.
Coru amantíssimu de Gesús ancoras nosàterus nos assugetaus a sunfriri su chi bosu bolleis,
candu boleis, comenti dhu boleis, e po cantu tempus dhu boleis, mentras est custu su
disígiu de su Coru nostru de donai glória a bosu fessit ancoras a costu de sa morti.
Sesta dí
Coru sagrau de su Redentori miu Gesugristu, chini mai podit cumprèndiri s’ecelléntzia,
e is perfetzionis bostas? Issas sunt infinitas. Cantu prus m’isforzu a nci pensai prus
connòsciu s’impoténtzia mia, e po cussu su sentimentu chi prus òperat in su coru miu
est unu profundu rispetu e veneratzioni. Coru divinu de Gesús, dèu penetrau de allegria
e de meravíglia, cunfessu chi is grandesas bostas sunti superioris a s’intendimentu miu,
e po cussu acumpangendumí cun su pensamentu, e cun su coru a totu sa corti celestiali
mi prostru a sa preséntzia bosta e bosi rendu sa glória, e s’onori chi meritais.
Ma mancai is perfetzionis bostas siant incomprensíbbilis, bèni si podit cumprèndiri
cantu nos eis amau de is provas de amori infinitu chi nos eis donau. E chini podit
pensai a is mistérius de sa redentzioni, e de s’Eucarestia sentza de esclamai, cantu est
bonu, e amàbbili su Coru divinu de su Deus miu! Bosu seis su veru, e leali amigu de
is óminis, bosu sa fonti perenni de is misericórdias, bosu s’únicu ogetu de s’amori de
is ànimas giustas: e issas bos aclamant su reparadori de is ofesas, chi ant comítiu, su
protetori de sa perseveràntzia insoru in sa virtudi, su remédiu de sa fragilidadi, sa
seguresa de sa saludi insoru. E comenti est possíbbili aduncas, chi s’incontrint corus
tantu insensíbbilis, po non s’amai?
Deh! Assumancu su coru miu siat interamenti cunsagrau, e po sèmpiri amau Gesús
miu. Bosu eis a èssiri sa glória mia, sa cunfiantza, sa felitzidadi mia, s’únicu amori
miu, dèu dh’isperu in vida e in morti. Aici siat.
Meditatzioni
Amabbilidadi de su Coru de Gesús.
Considera, ànima mia, a Gesús in sa vida púbblica chi iant fatu in su mundu, e as a
connòsciri chi s’amabbilidadi est istétia unu de is principalis caràteris de su divinu
Coru suu. Cun cali bondadi non cumpadessiat issu is Apòstolus sèmpiri difetosus?
Cun cali amori, e afabbilidadi non arreciat is pecadoris? No iat issu iscaciau mai a
nisciunu. Is pecaus de su pubblicanu, de Maria Maddalena, e de sa fémina adúltera
parit chi àteru efetu no àpanta prodúsiu in su Coru suu, che de aumentai po custus sa
cumpassioni, e sa làstima. Is fariseus, e is ebreus dh’ofendiant cun paràulas, e di-