Is Pregadorias antigas: su signo de sa devozioni - Provincia del ...

276
IS PREGADORIAS ANTIGAS - SU SIGNU DE SA DEVOTZIONI
Cuarta dí
Intrendu sa Virginedha Maria in su Templu e oferendusí inní solennementi a Deus,
pensat de abbarrai inní po totu su tempus de sa vida Sua fintzas a sa morti. Su disprétziu
chi tenit de su mundu, s’amori ardentíssimu cun su cali s’est a Deus interamenti
consagrada, s’afetu vivíssimu chi portat a sa domu de Issu, dha ligant fortementi a
cussu sagrau retiru. Nienti de mancu Issa est a su própriu tempus cun ammiràbbili
umilidadi preparada e pronta a calisiollat cosa chi de Issa bollat dispònniri su Segnori,
siat puru su prus penosu trabballu, su prus dolorosu sacrifítziu. Dèu seu, narat Issa
in s’íntimu de su coru Suu, pòbera serbidora de su Segnori: si fatzat in mei su chi
Issu at a bòlliri. O bella, o ammiràbbili dispositzioni de sa bell’ànima de Maria, chi si
est posta interamenti in is manus de Deus pronta a totu su chi a Issu plaxit, e de custu
solu plenamenti cuntenta! E comenti is ànimas perfetas non càmbiant is santus sentimentus
insoru poita chi non càmbiat s’Ispíritu chi dhas movit chi est s’Ispíridu Santu,
aici Maria chi est s’ànima sa prus perfeta e sublimi chi fintzas a insaras siat essia de
is manus de su Creadori, mantenit cun immancàbbili constàntzia custa dispositzioni
de profunda umilidadi po tota sa vida Sua fintzas a sa morti. Custa est sa dispositzioni
cun sa cali mi depu pònniri ancoras dèu in is manus de su Deus miu: annegatzioni de
s’amori própriu miu, totali summissioni a Issu de sa voluntadi mia, úmili prontíssima
ubbidiéntzia a totu su ch’Issu disponit.
Unu Babbunostu, tres Ave Maria, unu Gloria Patri.
Oratzioni a su Babbu Eternu
Santíssimu Eternu Babbu! S’oferta de sa Virginedha Maria est sa prus bella chi
fintzas a insaras siat istada fata a sa Magestadi Bosta e in su Templu de Gerusalemmi
e in totu sa Terra, e ancoras in su Celu. Is Àngiulus beatus dha portant cun veneratzioni
e cun allegria a su Tronu de sa Magestadi Bosta, e Bosu dh’arriceis e dha ratificais
cun altíssima cumplaséntzia de su paternu coru Bostu. Certamenti una de is prus
bellas perfetzionis de custa oferta chi est tantu atzeta a is ogus Bostus, est ch’issa est
intera, assoluta, sentza limitatzioni o divisioni. Maria s’est posta in is manus Bostas
commenti una cera modhi in is manus de s’artífitzi pronta a pigai sa forma chi a issu
plaxit de dhi donai. E Bosu seis contentíssimu de dha tènniri aici perfetamenti disposta
a totus is grandus òperas chi in Issa e po mesu de Issa depeis cumpliri po sa saludi
de su mundu e po sa glória Bosta. E comenti Bos eis a glorificai una dí tenendu
s’Unigénitu Fillu Bostu incarnau úmili e ubbidienti a totu fintzas a sa morti e a sa
morti de sa Gruxi, aici Bosi cumplaxeis e glorificais imoi in s’intera umilíssima oferta
de Maria, chi depit èssiri viva imàgini e digna Mama de su própriu Unigénitu Fillu
Bostu. Unu coru dividiu parti a Bosu, parti a su mundu, unu coru chi si donat a Bosu
solamenti po unu certu tempus, po unu certu logu, po una certa ocasioni, o chi ponit
conditzionis o dudas a s’oferta sua, no est ogetu de is cumplaxéntzias Bostas. – Dèu
mi bollu ofèrriri a Bosu, o Babbu miu celestiali. Ma poita conservu cudhus atacus?
Poita non renúntziu a cudha passioni? Poita retengu cudha difidéntzia, cudhu malu
timori chi m’iscoragit e mi narat chi no apu a perseverai, chi no apu a pòdiri, chi no
mi apu a isfortzai? Poita no Bosi ofèrgiu totu su coru miu, e non mi dongu totu e po