Is Pregadorias antigas: su signo de sa devozioni - Provincia del ...

Comune di Villacidro (Bidhaxidru)
tantu profundu su pensamentu suu po nosàterus, chi de su corpus suu curriat in sa
terra sudori de veru sànguini. Penseus a cudhu colpu de lantza chi in sa gruxi dh’iat
trapassau su costau, e chi po amori nostru dh’iat fatu versai de su sànguini suu fintzas
s’última guta: e casi custu non fessit bastanti Gesús in mesu ancoras a is triunfus suus
in su Celu at bófiu cunservai viva sa liaga de su costau suu, po fai intèndiri chi custu
Coru est sèmpiri apertu, e chi non cessat de fuedhai continuamenti a favori de nosàterus
a su Deus de is misericórdias: de manera chi sunt is liagas de Gesús chi disarmant
su bratzu de s’Eternu Babbu, sighendu a èssiri in su Celu cali fiat in su Calvàriu unu
Deus chi isburrat is pecaus de su mundu. Ah! Chi custu Coru est su prus amàbbili, su
prus téneru, su prus benignu.
Custu Coru, est beru, est Coru de unu giugi terríbbili, de su cali po is pecaus eus
meritau totu s’ódiu, e dogna castigu, ma de àtera parti non lassat de èssiri su Coru de
unu Salvadori, su Coru de unu Babbu, su cali no iscàniat mai is corus chi si cunfessant
pecadoris, usendu fintzas cun is prus perversus, e iscurregius sa pràtica de is
mamas terrenas, is calis cun d-una manu amaletzant, e castigant, e cun s’àtera a su
coru s’istringint is fillus.
In gràtzia aduncas de su Coru bostu divinu, o Gesús miu amantíssimu, dignaiosí de
èssiri favoràbbili a nosàterus totu pérdius in is pecaus, ma chi non boleus èssiri prus
pecadoris, mentras eus risólviu de soddisfai a bosu, de castigainosí po riparai cun sa
peniténtzia su disprétziu, e is disgustus causaus a su Coru bostu, essendu totu giustu
chi de parti nostra corrispondaus ancoras nosàterus a cudhas boxis de perdonu e de
misericórdia chi de is liagas bostas si elevant in su Celu a su tronu de s’Eternu Babbu
a favori de nosàterus. Aici siat.
Meditatzioni
Rassignatzioni de su Coru de Gesús in is patimentus.
Considera, ànima mia, chi Gesús si rassignat de totu coru a patiri. Un’Apòstulu parit
chi bollat istorraidhu de consumai su càlixi tantu amaru de sa passioni sua. Nisciuna
chèscia movit issu de sa zelosia de is Fariseus, de s’ingratitúdini de is Ebreus, de sa
perfídia de is Giudeus. Su Coru suu àteru non tenit de mira si no sa voluntadi de
s’Eternu Babbu, a sa cali si sotomitit... ecu ànima mia su perfetu esemplari chi depis
tui sighiri in is penas, e trabballus tuus, esemplari po su cali depis superai sa repugnàntzia
naturali de su coru tuu, modellu a simbilantza de su cali nienti ti depit turbai
a costu chi tropu mannas siant, e penosas is aflitzionis tuas... est beru chi tropu manna
est sa debbilesa tua, e sa fragilidadi o ànima mia, chi in tzertas ocasionis po tzertas
imposturas parit chi non bastit su coru a sunfriri; arregordadí però chi ancoras Gesús
iat isperimentau custa ripugnàntzia, e iat pregau s’Eternu Babbu chi si fessit possíbbili
dhu dispensessit de consumai cussu càlixi de amargura: ma pustis sa boxi tantu
lastimosa si fiat rassignau narendu “Siat fata sa voluntadi bosta… Dèu o Signori
adoru, e mi sotomitu in totu, e po totu a sa voluntadi bosta. Bosu seis miu, e candu mi
flagellais su Coru bostu est móviu de s’amori, e cantu prus mi flagellais mi feis
connòsciri de prus chi mi teneis in su Coru, e chi is flagellus non sunti, no, ispinas,
ma sunti floris chi provideis po sa corona mia.
571