Is Pregadorias antigas: su signo de sa devozioni - Provincia del ...

368
Dumus Aurea, sa domu de òru,
naraus a Issa domu pretziosa,
at allogiau a Gesús in su coru,
nareus domu santa e misteriosa,
domu luminosa, clara e risplendenti,
però po sa genti de coru pentida
domu Nodida po totus gratuita,
domu benedita dhi depeus nai.
Arca Noetica Maria est primitiva
po ponni is famíglias in sa riservantza,
Arca continuanti de coloris viva
chi in tempus de ira mostrat sa bonantza,
Arca de Alleantza de su Testamentu,
Arca chi at tentu cumentzu e non fini,
ver’Arca po chini dh’amat cun giustesa,
Arca po salvesa po no si dannai.
Janua Coeli est simbolegiada,
Maria est sa porta aberta de su celu
Fit prus de cuatru mill’annus serrada,
curpa de is Àngelus de coru ribbellu,
Costau dh’est trupellu a su Redentori,
Maria cun amori sa porta at obertu
po sa genti certu s’est istabbilida,
ma chi no est pulida non podit intrai.
Stella Matutina po su viagianti
cantaus po cussu Ave maris Stella,
Giuanni s’Apóstolu dh’at bista brillanti
de catódixi astrus circundada e bella,
s’umana favella dha vantat, dh’onorat,
su soli dh’adorat, sa luna s’inchinat
po chi pellegrinat sa scorta est Maria,
vera istella e ghia po s’indiritzai.
Salus Infirmorum po su malaidóngiu
Mamma de saludi ti ant titulau,
est totu su mundu interu testimóngiu,
mortus, moribbundus vida ant gosau,
t’ant ringratziau tzurpus, paralíticus,
mudus e rachíticus noamenti sanus
de peis e de manus, de língua e de vista
e origa provista de intendi e iscurtai.
IS PREGADORIAS ANTIGAS - SU SIGNU DE SA DEVOTZIONI
Maria est rifúgiu de is pecadoris:
chi no est a Issa a chi ricurreus?
Fàcilis arrui in totu is erroris
de una terra fràgili de cumenti seus?
In Issa poneus sa nostra cunfiantza,
fidúcia e sperantza po chi s’infernali
cun dogna mortali non tengat vitória,
nàscius a sa glória seus po andai.
Sa Consolatzioni de is Afligius,
s’únicu cunfortu de is disperaus,
potenti abbogada de is persighius,
sa riparadora de is precipitaus,
ossessus libberaus de sa tentatzioni,
s’innocenti in presoni tenit libbertadi,
Maria fatu dh’adi ca est Mamma de Deus,
po dha crei proveus a crésia abbitai.
Maria est s’agiudu de is cristianus
poita s’agiudat cun maternu afetu,
agiudu a is reis e Pastoris Romanus,
agiudu po totus in craru e in secretu,
agiudu perfetu puru est in sa coja,
agiudu de gioja po is innocentis,
agiudu a is dolentis in ira e flagellu
Maria de su celu mandat po cessai.
Regina de dogna angélica Milítzia,
po Maria fàinti genuflessioni,
de su Gabrieli cun bella notítzia
ricit lillu e palma in s’aparitzioni,
in s’Assuntzioni bellamenti intera
in dogna schiera a celu innaltzada,
cun triunfu innaltzada sa Regina eleta.
sa glória cumpleta po dhi meritai.
De is Patriarcas Regina in s’impreu
patriarcali ebràica illustri parentela
cumenti declarant Luca cun Mateu,
po totu su mundu sentz’e cautela
Issa sa prus bella de cussus parentis,
monarcas potentis giugis e levitas
po òperas infinitas de magnificéntzia
Maria in discendéntzia dépiu at superai.