Is Pregadorias antigas: su signo de sa devozioni - Provincia del ...

Comune di Samassi
sunt in riguardu a Deus. Imoi sa Santa Crésia nos imparat chi àtera idea non depeus
formainosí de Maria che sa chi is Divinas Iscrituras nosi donant de sa Sapiéntzia
increada, est a isciri de su própriu Eternu Fillu de Deus. Bolit nai chi comenti su Fillu
in su Mistériu de sa Trinidadi Santíssima est su Primogénitu de su Babbu, aici intre is
puras creaturas est sa Primogénita Maria. Su Fillu generau ab eternu in su sinu de su
Babbu e a Issu uguali; Maria viva immàgini ancoras Issa, non già uguali a su Babbu,
ma in altíssimu gradu acanta e símili a Issu. Su Fillu primàriu ogetu de is eternas
cumplaxéntzias de su Babbu; Maria s’àteru ogetu de is Divinas delítzias inter totus is
puras creaturas. Insumma comenti su Fillu fiat in totu s’eternidadi personalmenti cun
su Babbu, aici Maria fiat in sa menti de su Babbu presenti ab eterno non comenti is
àteras simplis creaturas, ma cali est istétia apustis creada de Issu in su tempus, sa
prima in dignidadi e in privilégius, sa prus bella, sa prus digna, s’única sèmpiri immaculada
e sèmpiri santa, cudha insumma chi, segundu sa veríssima senténtzia de
unu Santu Padre, súperat po sa dignidadi de sa eletzioni Sua dógnia prus sublimi
altura de is eletus: omnem electae creaturae altitudinem electionis Suae dignitate
transcendit: (Gregor. Magn. in 1 Reg. 1)
Unu Babbu nostu, tres Ave Marias, unu Gloria Patri.
Oratzioni a su Eternu Babbu
O Divinu Eternu Babbu! Gràtzias sentza fini Bosí torraus, poita chi non podendu
nosàterus mortalis concebiri cali est in sèi etotu sa dignidadi de Filla Primogénita chi
eis donau a Maria, Bosí seis dignau de imparai a sa Crésia Bosta, chi aplichessit a
Issa is grandesas e is maravíglias de sa Sapiéntzia Increada chi Bosu etotu iais fatu
registrai in is librus Santus. Si, infinitas gràtzias Bosí tòrrinti totus, o Babbu de is
luxis, de su cali dógnia beridadi benit a sa Crésia, e dógnia donu perfetu. Ma calis
gràtzias ancora prus mannas no Bosí depeus po tantu sublimidadi a sa cali eis elevada
Maria, po tantu distintu amori cun su cali dh’eis mirada de totu s’eternidadi? Poita
chi s’adotzioni chi eis fatu de Issa in Filla est istada tantu ecellenti e singulari, chi
casi pagu dha distingueis de cudhu chi est Fillu Bostu Primogénitu po natura. E ita
eus a nai de su distintíssimu amori e de is altíssimus favoris, cun is calis dh’eis tratada
in su tempus de s’esisténtzia Sua? Chini at a pòdiri cumprèndiri cali sollícita e
amorosa cura eis tentu de Issa in su delicadíssimu instanti, in su cali eis pigau a dha
bogai de su nienti? Ah! chi apustis de un’eterna preordinatzioni, apustis de una eterna
cumplaxéntzia a sa sola idea de Maria, Bosu chi seis puru cun totus Babbu amantíssimu
e ótimu, no eis certamenti lassau mancu po unu momentu s’esisténtzia de custa
Filla predileta sentza scuisitíssimas gràtzias istraordinàrias, chi prus bella dha fatzessint
sèmpiri a is paternus ogus Bostus e prus amàbbili. Su primu àlidu de vida chi
dh’eis ispirau est istau de certu unu spíritu superiori de gràtzia santificanti. Sa prima
mirada chi dh’eis donau est istada de certu non de ódiu, ma de teneríssimu amori. Sa
prima paràula chi dh’eis dirígiu in cussa prima íntima comunicatzioni est istada de
certu cudha de cumplaxéntzia e de allegria: totu bella ses tui, o Filla mia, totu bella e
immaculada: tota pulchra es ... et macula non est in Te. (Cant. 4,7)
Unu Babbu nostu, tres Ave Marias, unu Gloria Patri.
237